3655/2024-2025

Dated Hnahthial, the 23rd December, 2024: Vawiin chhun khan Hnahthial Addl SP, Pu Lalhmangaihhlua chuan Krismas hmaa an office kai tawp niah Hnahthial District chhunga thuthar lakhawmtute chu thingpui inpuiin an hmalakna hrang hrangte hrilhfiahna hun a nei a. Thuthar lakhawmtute hi Krismas thilpek a hlan nghal bawk.

Addl. SP chuan Hnahthial District chhunga dan leh thupek tha taka kenkawh a nih theih nan Hnahthial Police te chuan theihtawp an chhuah thin thu sawiin kumin 2024 kum bul atanga vawiin 23.12.2024 thleng hian Hnahthial District chhungah thubuai sawmruk pali (64) ziahluh tawh a nih thu a tarlang a. Heng case-ah te hian mihring sawmsarih pali (74) man niin case register zawng zawng atang hian case sawmnga paruk (56) chu chinfel (CS/FR) an ni tawh a ni. Case pariat (8) chhuizui lai mek a awm tih a sawi bawk.

Halpuah leh halmawi lam chi reng reng khapna thupek DC, Hnahthial in a chhuah chu khauh taka kenkawh mek a ni a. Hemi bawhzui nan hian Hnahthial District chhunga Police Station leh Outpost ten an bial chhung theuhvah ngawrh takin checking an nei thin a. Tun thlengin, hetiang kaihhnawih a thubuai ziahluh/case register erawh a la awm lo thung a ni. Halpuah leh halmawi khapna thupek bawhzui nan hian Hnahthial Police leh Hnahthial Sub-Headquarters YMA tangkawp chuan Hnahthial District chu halpuah leh halmawi hal lohna District anih theih nan theihtawpin hma a la mek a. Hemi khapna thupek bawhzui leh puanzar kawnga Hnahthial District chhunga khua leh veng tithate hnenah Sub-Headquarters YMA te nena tangkawpin lawmman pakhatna atanga pathumna siam tum a ni.

Addl SP chuan hunpui, Christmas, 2024 leh Kumthar 2025 lo thleng turah hian Hnahthial District mipui ten hlim tlang taka an hman theih nan Hnahthial Police-te chuan veng hrang hrang-ah duty an dah thu sawiin 23.12.2024 atang hian an duty tan dawn a. Hemi bakah hian officer ten duty post hrang hrang an tlawh kual reng thin dawn a ni. Mipui ten harsatna awm lova an bazar theih nan ruahmanna siam niin ni hnih chhung, 23.12.2024 - 24.12.2024 hian Hnahthial Bazar area chu ‘No Vehicle Zone’ ah puan anih thu pawh a sawi bawk.

Thuthar lakhawmtute pawhin zawhna an neih te zawtin SP office nen an hmalak hona tur an duang bawk a ni. He hunah hian Addl. SP bakah Hnahthial Police Officer dangte an tel bawk a ni.