645/2024-2025
Hnahthial the 3rd June 2024: DC Conference Hall, Rallangtlang, Hnahthial-ah naktuk maia Lok Sabha MP inthlana vote tla te chhiar tura ruat counting official-te tan training thawh hnihna leh a hnuhnung ber tur chu vawiin khan buatsaih a ni a, training thawh khatna hi May ni 24 khan neih a lo ni tawh bawk.

Vawiin training-ah hian District Election Officer, South Tuipui Bial Assistant Returning Officer (ARO) ni bawk Pu Chuauhnuna chuan thu hma sawiin vote tla chhiar tura mawhphurhna pek counting official-te chu duhsakna a hlan a, vote tla chhiar ah fimkhur hle turin leh zing dar 7:30 ah counting hall-a kim vek tawh turin a chah a, hall chhungah rik rum rum te, observer-te mit hmuha mawi lo leh an mit tikham thei zawnga che lo hram turin leh mawihnai taka thawk theuh turin a chah.

Nodal Officer for Training, DRDO Project Director, ni bawk Dr Malsawmtluanga Fanchun pawhin a hun taka thlen a pawimawh thu a sawi a, venhimna a khauh hle dawn avangin harsatna an tawh loh nan an ID ken theinghilh palh lo tura fuihin counting official hrang hrangte tih tur leh mawhphurhna sawifiahna a nei bawk. Dr Malsawmtluanga Fanchun chuan vote chhiar uluk a pawimawh hle thu tarlangin tihsual palh hlauh chuan election process zawng zawng chu awmze neilo (null and void) a nih tur thu a sawi a, mitin fimkhur taka an mawhphurhna hlen chhuak theuh turin a chah bawk a ni.

District Level Master Trainer Pu R Vanlalruata, SDC leh Pi Betty Lalrinfeli, SDC te chuan counting official-te hi hands-on practice an neihpui a, harsatna awm thei ang te leh a chinfel dan tur te an hrilh bawk. Lok Sabha MP inthlan result hi naktuk maia chhiar tawh tur a ni a, Hnahthial District a Assembly Segment awmchhun 29-South Tuipui, Polling Station 27 awmah chuan counting table 14 ruahman niin round 2 a chhiar zawh beisei a ni a, vote tla te hi zing dar 8 a chhiar tan tur an ni ang.

Attachment

  • Loading attachment...