646/2024-2025

Dated Saitual the 3rd June, 2024: Vawiin khan Lok Sabha MP Inthlanpui 2024 vote chhiar tura inbuatsaihna kal mek ah Observer, Pu Mahesh Kumar Santhaliya hovin randomization of polling parties chu neih a ni a, hetah hian Saitual DC leh DEO ni bawk Dr Lalngura Tlau leh Election Official dangte an tel a ni.

Vawiin a randomization-ah hian Observer chuan Mizoram chu muanna ngaina leh dan ngai pawimawh anni tih a lo hriat lawk tawh thu sawiin buaina leh harsatna em em tun election vuakvet ah a awm lo chu a lawmawm hle a ni, a ti a,  hun muanawm tak hnuaiah vote chhiar a nih ngei a beisei thu a sawi.

Vawiin a randomization of polling parties a thawh hnihna ah hian Counting Supervisor, Assistant leh Micro Observer ten an Assembly segment chan theuh a hre ta a, naktuk zing dar 5 a third randomization ah an dawhkan chan theuh an hre dawn bawk a ni.

Vawiin a randomization neih zawh hian Counting Supervisor, Assistant leh Micro Observer te tan Saitual DC conference room-ah training buatsaih nghal bawk a ni a, hetah hian Assembly segment pathum- 9 Tawi, 8 Chalfilh leh 21 Lengteng a vote chhiar tur te an tel a ni.

Naktuk, June ni 4, 2024 hian Lok Sabha inthlanpui 2024  vote chhiar turah Saitual District chu zing dar 8 ah tan a ni anga, round 3 a chhiar tur niin Assembly Segment pathum a PS 80 tan table 28 ruahman a ni.