3498/2023-2024

Hnahthial the 25th January 2024: India hmun dangte rualin vawiin khan Hnahthial-ah National Voters’ Day 2024 hman a ni a, he hun hi Government Higher Secondary School, Hnahthial-ah hman niin District Election Officer, Pu Chuauhnuna, District Bawrhsap ni bawk chuan Khuallian niin a hmanpui.

Khuallian Pu Chuauhnuna chuan zirlai naupangte leh kalkhawm zawng zawngte chu National Voters’ Day 2024 chibai a buk a, hetiang ni pawimawh takah zirlaite hmaa thusawina hun tha tak a nei thei chu lawmawm a tih thu a sawi.

Khuallian chuan National Voters’ Day chu inthlan kaihnawiha thuneihna sang ber nei tu Election Commission of India (ECI) din champha a nih thu a sawi a, inthlanna thianghlim leh felfai tak kengkawh thintu ECI din champha puala hun hman thin a nih thu a tarlang a ni.

Zirlai naupangte chu Danpui (Constitution) hlutzia hrechiang tura fuihin intluktlanna, mitinin dikna chanvo kan neihna thuthlung pawimawh tak a nih thu hre reng turin a chah a, kum 18 tling tawh, electoral roll a la chuanglo te pawh inziaklut thuai turin a chah a ni. India Danpui hnuaiah inthliarna awm miahlo a duhthlanna chanvo angkhat kan nei chu lawmna chang hriat thar fo a tul thu leh chu chanvo chu a tak a chantir tura vote thlak thin a pawimawh thu a sawi bawk a, Mipuite duhthlannaa ram hruaitu thlanchhuahna ram lian bera voter nih chu ropui a tih thu a sawi bawk. District Bawrhsap Pu Chuauhnuna chuan a bikin 2023 inthlanpui a thalaiten vote an thlak tha hle chu lawmawm a tih thu sawiin thalaiten ram inrelbawlna kawnga an mawhphurhna hria a, a hmatawngah an tang chho zel chu ropui a tih thu a sawi. Ram Venhimna (defence) leh Democracy chu India ram innghahna lungphum pawimawh tak a ni tiin vote thlak lama tan la thar theuh turin a sawm bawk. Zirlai kalkhawmte chu fuihin taimakna leh tumruhna nen Hnahthial District tan theihtawp chhuaha zir tang tang turin a fuih hlawm a ni.

Vawiin 14th National Voters’ Day lawmna programme-ah hian Election Commission of India ruahhmanna angin ‘Nothing Like Voting, I vote for Sure’ (Vote thlak tluk a awm lo, vote ka thlak ngei e) tih thupui hmangin thutiam chham rualna(pledge taking) hun hman ho nghal a ni.

14th National Voters’ Day puala Government High School, Hnahthial zirlaite tana buatsaih Painting Competition Leh Government Higher Secondary School, Hnahthial zirlaite tana buatsaih Essay writing competition a titha lawmman semna neih nghal a ni a, lawmman dawngtute chu:

Painting Competition:
1) Josephine Lalrinmawii ( Class-X)
2) Lalhlimpuia ( Class-IX)
3) Vanlalawmpuia (Class-IX) leh T Vanlalrinhlui ( Class-IX)

Essay writing competition:
1) Zorinpuii (Class-XII)
2) C Kawnghawnmawii ( Class-XI)
3) Vanlalhmangaiha (Class- XII) te an ni.

Vawiina lawmman dawngtute hian citation bakah pawisa fai an dawng theuh bawk a ni. National Voters’ Day 2024 pual hian Best Booth Level Officer (BLO) pawh thlan niin Pu H Zavela, Ngharchhip BLO chu thlan a ni a, Best BLO hian pawisa fai cheng 3,000/- a dawng bawk a ni.

Vawiin hun hi Pu Lalbiakfela, Election Officer, BDO ni bawk chuan a kaihruai a, pledge taking hi DIPRO Pi K Ngosai chuan kaihruaiin Pi Betty Lalrinfeli, SDC chuan lawmthu sawiin hun tawp a khar a ni.