3497/2023-2024

Khawzawl, 25th January 2023: Vawiin khan Khawzawl DC Conference Hall-ah National Voters’ Day vawi 14-na chu hman a ni a. He hunah hian Khawzawl Bawrhsap, District Election Officer ni bawk Pu K. Lalrohlua chu khuallian niin Voters’ Day puala inelna District Election Office-in a buatsaih – Quiz, Essay leh Painting Competition-a tithate hnenah lawmman a hlan a. 22-Tuichang AC a Booth Level Officer thawk tha te hnenah Best BLO Award a hlan nghal bawk a ni.

Pu K. Lalrohlua chuan National Voters’ Day 2024 chu India ram chhunga Voter mi vaibelchhe 96 zet te ni pawimawh tak a ni tiin, lawmna hun hmang tura kalkhawmte chu chibai a buk a. India ram chu Democracy ram lian ber, mipui ten an aiawh tur zalen taka an thlan theihna ram ropui tak a ni, a ti a. Mipuiin an aiawh tura an thlan chhuah te chu zah thiam a pawimawh thu a sawi bawk.

Khawzawl Bawrhsap chuan India ram chu lungphum pawimawh tak tak pathum – Legislature, Executive leh Judiciary ten felfai taka ram rorelna an kalpuina thin a ni, a ti a. Mizoram chu India ram state ralmuang ber a ni a, chuvangin mipui ten vote thlak kawngah harsatna an nei lo a, ralmuang leh thlamuang takin an duh an thlang thei thin a ni, a ti. Khawzawl District-in a tumkhat nan Mizoram Inthlanpui 2023-a an hmachhawn chungchang pawh sawiin Bawrhsap chuan Booth Level Officer te leh Political Party te thawhpuina tha tak an dawn avangin lawmthu a sawi a. Kum upa leh PwD ten anmahni inlum ngeia vote an thlak thei ta chu hmasawnna ropui tak a nih thu a sawi bawk. Inthlan buatsaih danin hma a sawn chhoh zelnaah Khawzawl District mipuite chu an ngaihtuahna seng thar turin khuallian hian a ngen a, Mizoram Assembly Constituency te siamrem (delimitation) an nih hunah District mipuite tana awlsamna thlen turin hmalak tum a ni, a ti bawk.

National Voters’ Day hi Election Commission of India dinchampha hriatreng nan kum 2011 atang khan hman tan a ni a. Vawiin inkhawm hi Khawzawl Election Officer Pu Timothy R. Lalhmangaiha chuan a kaihruaiin, Pi Lalhruaitluangi, Electoral Registration Officer chuan Vote nei thar te hnenah EPIC a hlan a. Asst Electoral Registration Officer Pu Elijah LH Sanga’n lawmthu sawina hun a hman zawhah inkhawm hi tihtawp a ni.

Vawiin inkhawmah hian National Voters’ Day pualin thutiam lak a ni a, Khawzawl District chhunga sawrkar hmun hrang hrangah pawh Head of Office te kaihhruainain thutiam lakna hun hi hman a ni. Khawzawl District Election Office chuan National Voters’ Day puala inelna hrang hrang an buatsaihah zirlai thahnem tak an tel avangin lawmthu a sawi a, mipuite chu roll siam rem hunlaia an EPIC a dik lo lai te siam remna chang hre turin a ngen bawk a ni.

National Voters’ Day puala buatsaih inelna hrang hranga lawmman la tu te chu:

Quiz Competition:
1. Khawzawl Higher Secondary School (Samagra Shikhsha)
2. Model High School, Khawzawl.

Essay Competition

1. C. Lalfakzuala s/o PC Rosangpuii, Govt Khawzawl HSS
2. Ngamginmang Touthang s/o Helkhawlien Touthang Govt Khawzawl HSS
3. R. Lallawmkimi s/o R. Lalduhawma Far East Experimental School

Painting Competition

1. Felic Malsawmzuala Govt Model High School
2. Lalnunfeli Govt Khawzawl HSS
3. Jeremy Vanlalhmachhuana Govt Khawzawl HSS; te an ni.