4006/2023-2024

Hnahthial the 29th February 2024: District Legal Services Authority ( DLSA) Lunglei buatsaihin vawiin khan RD Conference Hall, Hnahthial-ah Mizo dan leh hrai, Hmeichhe dikna chanvo leh dan in hmeichhia-te a humhalh dan inzirtirna ‘The Mizo Marriage, Divorce & Inheritance of Property Act and Laws relating to Women’ buatsaih a ni. He hun hi Pi Lalthansiami Hnamte, CJM Lunglei, DLSA Secretary ni bawk chuan kaihruaiin Pu B Laldinpuia, Advocate chu resource person a ni.

Resource person chuan kalkhawmte chu chibai bukin mahni hnam dan leh hrai hriat chian a pawimawh hle a ti a, kalkhawmte chu an thiante, an chhungte hrilh chhawngtu ni theuh tura sawmin hriatlohna chu thiam channa a nih loh thu a sawi. India Constitution-a Article 371G chuan Mizo hnam kalphung leh sakhuana a hum tlat thu a tarlang a, hnam zia leh kalphungte chawinungtu ni zel turin a chah bawk. Hmanlai Mizo lal ten an khua theuhah rorelna fel tak neiin ro an rel thin a, rualkhai zawka Mizo lal hrang hrang ten dan an neih theihna turin NE Perry chuan bul tanin lal hrang hrangte dan lakkhawm tan a ni, ti. kum 1980 a din Mizo Customary Law Committee chuan chak taka hma lain rawtna siam hun hawn a nih thu a tarlang a, NGO te leh Mizo mipui tak tak hnen atanga rawtna nen ‘The Mizo Marriage, Divorce & Inheritance of Property Act’ 2014 a lo chhuah tak thu a tarlang. Dan siam tuten an siam satliah nilovin Mizo Mipui duhdan leh rawtna nena, uluk taka ngaihtuah a nih hnua siam a nih avangin a ropui hle a ti a, a chhuanawm hle a ti bawk. Mizo Dan in inneih a phal chin chu hmeichhe kum 18 chin leh mipa kum 21 chin chunglam an ni a ti a, kumtlinglo inneih chu dan in a phal lo tiin nu leh pate bakah mitin fimkhur a, naupangte veng tlat turin a chah. Mizo dan hnuaia inthen theih dan te sawiin uirena, inrem theihlohna lian tak an neihin, innghaisakna, chendun hlawhawm khawpa an awmin, a tu emaw zawk chin hriat loha kum 7 an awm bovin emaw a tu emaw zawkin kum hnih aia tlem lo an chhuahsanin emaw, an pahnih duhthlanna a inthen te chu Mizo dan chuan inthenna tlakah a ngai, a ti bawk. Hei bakah hian Pu B Laldinpuia chuan Mizo Hnam dan a ro khawm chungchangte leh Hmeichhe humhalhna dan awm te sawifiahna a nei bawk a, Hmeichhe awm nem zawk, chaklo zawkte chuan humhalh an mamawh hle a ti a, ram changkanglo apiangah hmeichhia leh mipa dinhmun a inthlau tiin an zahawmna hum tlat a, Hmeichhe thlavang hauhtu ni theuh turin a sawm. Resource person in thu a sawi zawh hian zawhna leh chhanna hun hman a ni bawk.

Vawiin legal awareness campaign-ah hian NGO hrang hrang aiawhte , MHIP Sub Hqrts , MUP, VC te leh chanchinbumite bakah Govt Hnahthial college zirlaite an tel. Campaign programme zawh hian Hnahthial bazar-ah Mobile Lok Adalat neih nghal a ni a, pawisa ba thubuai, pasal then tana mahni leh fate chawmna thubuai, ram inchuh thu buai leh thubuai dang nei te tan thubuai rem hun buatsaih ni bawkin  hun hlawkthlak tak hman ho a ni.