4007/2023-2024

Aizawl, the 29th February, 2024: Tukin khan Chapchar Kût 2024 lawmna pualin Aizawlah a huhova tlan 'Chapchar Kût Run' buatsaih a ni.

Khuallian ni a he hun hmanpuitu Sports & Youth Services Minister Pu Lalnghinglova Hmar chuan hnam hrang hrangin mahni pual Kût an neih thu leh tunhma leh tun huna lawm dan erawh a inang vek tawh loh thu sawiin, Mizote'n Kût chi hrang hrang kan neih zingah Chapchar Kût chu Kût ropui leh ngaihhlut hlawh ber a ni, a ti a. Mahni Kût ngaihlua chawilar thiam apiangte'n an hlut thu sawiin, Kût chu hnam ziarang chawinunna leh inawmtleina bakah khualhiptu pawimawh tak a nih tel thu sawiin, Chapchar Kût chu a nihphung leh ziarang hlauh chuang si lova kan cheimawi thiam poh leh a hlu zual dawn a ni, a ti a. Pu Lalnghinglova Hmar chuan Chapchar Kût lawm rualin pipu nun mawi aia upa zah leh zonun zemawi tak takte uar zel a pawimawh thu a sawi a, nu leh pate thu awih theihna chhawmnun zel a tul thu a sawi bawk.

Chapchar Kût Run hi thuang hniha neih niin, Chanmari leh Sikulpuikawn atangtein Lammual panna tlan a ni a. Prof. Malsawmliana, Gen. Secretary, CYMA-in Chanmari atanga tlante hi kaihruaiin Prof. Lalnuntluanga, Vice President, CYMA-in Sikulpuikawn atanga tlante hi a kaihruai thung a ni.

Chapchar Kût Run puala Lammuala hun hman hi Pu Gen Khan Do, Joint Director, Art & Culture Department chuan kaihruaiin, Pi Carol VLMS Dawngkimi, Director, Art & Culture Department-in lawmthu sawiin hun hman a khar a ni.

He hun hi Art & Culture Minister Pu C. Lalsawivunga chuan a telpui bawk a ni.