4008/2023-2024

Khawzawl, 29th Februrary 2024: Vawiin khan Khawzawl Bawrhsap pisaah Khawzawl District Narco Coodination Center (NCORD) chu an Chairman Pu K. Lalrohlua, Khawzawl Bawrhsap hovin an thu khawm a. He hunah hian Ruihhlo dona kawnga tha thawhtu sawrkar Department hrang hrang aiawhte bakah tlawmngai pawl aiawhte an tel a ni.

Thutkhawm kaihruaitu Pu K. Lalrohlua chuan kalkhawmte inlawmna thu sawiin, meeting koh chhan te a sawifiah a. Ruihhlo la ti ve lo ten an tih chhin ve lohna tura hmalak chu thupui bera neih a tul tih a sawi. Chairman hian NCORD thutkhawm hnuhnung bera rorel bawhzuina report pe turin a mawhphurtu Department te a sawm a, ruihhlo dona kawnga hmalakna hrang hrang te ngaihthlak chhunzawm a ni.

Vawiin thutkhawmah hian Khawzawl District Level Narco Coodination Center (NCORD) thutkhawm hmasa January ni 31, 2024 a neih thurel bawhzuiin Cod Nerc ten Tlangmawi khuaah ruihho chungchang inzirtirna ‘Awareness Campaign’ hlawhtling tak an neih thu tarlan a ni a. Khawzawl Superintendent of Police Pu Lalchhuanthanga chuan thutkhawm hmasa leh vawiin thutkhawm inkar chu inbuatsaihna hunah an hman thu sawiin, March thla atang chuan chak leh zuala ruihhlo do turin an inpuahchah mek tih a sawi a. Hmachhawp an neih mek zingah checkgate tih changtlun leh ngawrh zawka Vehicle Checking neih te chu a langsar zual a ni.

Vawiin thutkhawm hian March thlaa NCORD thutkhawm neih leh hunah sawrkar kum thara (2024-25) Ruihhlo Awareness Campaign neih dan tur ruahmanna pharh hman ni se tiin a rel a. SP Office, District Hospital leh Cod Nerc te chu lo inrawnkhawma, ruahmanna hi lo siam turin mawhphurhna pek an ni. SP Office hi Joint Vehicle Checking neih hun tur lo ruahman tura mawhphurhna pek an ni bawk. Thutkhawm hian March thla chhungin Khawzawl khaw chhunga Presbyterian Kohhran pathum – Vengsang, Venglai leh Dinthar naupang chawhnu inkhawmah te Ruihhlo chungchang inzirtirna Awareness Campaign neih ni se tiin a rel bawk a ni.