1395/2023-2024

Hnahthial The 4th August 2023: Hnahthial District tih puitlinna kal zelah vawiin khan Minister leh bialtu MLA ni bawk Dr. R. Lalthangliana chuan District Sericulture Office leh District Civil Supply Officer pisa a hawng.

Dr R Lalthangliana chuan chak taka hmalatu Department changtu Minister leh a thawhpuite chungah lawmthu sawiin District chu tute pawhin puang se, Mizoram tan rahbi thar a nih thu a sawi a. Kum 1998 a District a hlankai 5-te leh tuna District thar 3-te hlawhtlinna chu lawmawm a tih thu a sawi. District chuan kentel a ngah thu leh office hawng tur chuan tih tur tam tak a awm thu Minister chuan a sawi a, DTO leh DLAO pisa te pawh hawn thuai tura hmalak mek a ni a ti. Hnahthial District chu Sericulture Department hnuaia Pangang vulh kawngah an thawh hlawk hle tiin DSO pisa hawn tak chuan Pangang vulhtute tan hmasawnna nasa zawk a thlen ngei a beisei thu a sawi bawk a ni.

Food, Civil Supplies & Consumer Affairs Department hmalakna pawh fakawm ti hlein hun khirh tak Covid leh ramri buai karah pawhin Buhfai-ah harsatna awm lova hmalakna an kalpui thei thin chu a lawmawm hle a ti bawk. A bial chhunga hmasawnna hrang hrang tarlangin Ministry of Defence hnuaiah cheng nuai 9100 chuangin Tuipui D lei dawh thuai a nih tur thu leh Thingsai - Pangkhua inkalpawhna kawng Kilometre 21 chuang hlek hmabak awm pawh cheng vaibelchhe 111 ruahman a nih thu a sawi a ni. Minister Dr. R. Lalthangliana chuan kalkhawmte chu hriselna ngai pawimawh tura chahin taksa sawizawi uar zual sauh turin a fuih bawk a ni.

District Bawrhsap Pu Chuauhnuna pawhih Hnahthial-a DSO leh DCSO pisa hawn a ni chu lawmawm a tih thu leh Hnahthial District tan chhenfakawm tak a nih dawn thu sawiin dawrtu mipuite chu ngaih pawimawh a tul thu a sawi a. Deparment hrang hrangte thawhhona a that a, inngaihchan tawn a,inpuihtawnna nen chuan a hlawkna tel tur chu mipuite an ni dawn a ti bawk.

Vawiina hawn tak DSO Hnahthial-ah hian District Sericulture Officer Pi Rosy Lallawmzuali Fanai hovin thawktu 11 an awm mek a, DCSO pisa ah hian Pu Hmingsangliana DCSO hovin thawktu 5 an awm mek bawk a ni.

Vawiina DSO leh DCSO pisa hawnna inkhawm hi Horeb Conference Hall-ah neih niin Sericulture leh FCS&CA Department hotute an tel a ni.