4156/2023-2024

Hnahthial the 14th March 2024: Kumin MP inthlan lo thleng tur inbuatsaihna chu Hnahthial-ah pawh urhsun taka kalpui mek zel niin vawiin khan DC conference hall-ah Election Expenditure Monitoring (EEM) hnuaia team hrang hrang Video Surveillance Team (VST), Video Viewing Team (VVT), Static Surveillance Team (SST), Flying Squad leh Accounting Team-te tan training buatsaih a ni.

Election Officer Pu Lalbiakfela chuan he training hi kaihruaiin kalkhawmte chu an mawhphurhna theuh ah theihtawp chhuah turin a ngen a, MP election a nih avanga inthlahdah lo turin leh tan la thar leh theuh turin a chah. Pi Betty Lalrinfeli, District Level Master Trainer, SDC ni bawk chuan training hi pein team hrang hrangte chanvo leh mawhphurhna a sawifiah a, kalkhawmte hnen atangin zawhna leh chhanna hun hman niin hriatthiamloh te inhrilhfiahna hun hman a ni bawk.

Hnahthial district EEM team hnuaiah hian VST team-1, SST team-2, VVT team-1, Flying Squad team-2 bakah accounting team te leh MCMC te an tel a ni.