4155/2023-2024

Dated: Aizawl the 14th of March: Tukin zing dar 7.30 khan Health and Family Welfare Minister, Pi Lalrinpuii hovin “World Kidney Day” puala hun hman a ni a, he ni hi Mizorama vawi khat hmanna a ni. He hun hi Nephrology Department, Synod Hospital-in a buatsaih a ni.

Minister chuan kidney (kal)  pawimawhna hriat a tul zia sawiin, ‘kal natna’ laka inven dan sawi nasat a tul thu a sawi bawk.

Minister chuan Zoram mipuite'n “Healthy Living” kan mamawh thu sawiin, kan taksa mamawh tawk exercise leh ei in tha lak luh inzirtir a tul thu a sawi a. Chu chuan tunlai natna hrang hrang - BP sang, Zun thlum etc kan tihte lakah min vengin kal hrisel tak neih nan a tangkai thu a sawi.

Kal chhia enkawl nan sawrkarin, Covid hma kum 5 chhung khan kal thlakna atana sum a sen ral ( NOC pek chhuah base in) chu cheng vbc 28 a ni a, senso ti sangtu ber chu Mizoram chhunga kal thlakna awm lo hi a ni a ti. Health Minister chuan mipui mimir, mi rethei zawkte tan Mizoramah ngei Mizo daktawrte  hmanga  kal thlak a nih theih nan sawrkarin theih tawp a chhuah thu a sawi a, kal thlakna hmun leh hmanrua neih tumin hma lak mek a nih thu a sawi bawk. Kal Natna Benvawn (Chronic Kidney Disease) lo nei palh tawhte tan pawh District Hospital tinah Dialysis Centre dah tura hma lak chhoh zel niin, Aizawl, ZMC, Lunglei, Champhai, Kolasib-ah te chuan Dialysis tih theih a ni tawh.

He hun hi Dr. R.L.Sanghluna, Medical Superintendent chuan kaihruaiin, Dr Joseph Lalhmachhuana, Consultant, Nephrology-in thu tawi te sawiin, “World Kidney Day” hman chhan leh a tumte a tar lang a. He hunah hian dialysis patient Kum 60 chuang tawhte hnenah thil pek hlan an ni. Dr Lalnunnemi ,Dy Medical Superintendent chuan he hun hi a khar.

World Kidney Day hi kum tin March thla Ningani vawi hnihnaah hman thin a ni a, tun kum thupui atan “ Kidney Health for all” hman a ni.