Nimin khan ni 3 chhung awh tur Census 2011 training chu Hnahthial Government Middle School-ah Enumerator/Supervisor te tan tan a ni. He hun hi Pu R. Rohnuna, SDO(C), BDO leh Charge Officer Census 2011-in kaihhruaiin, Pu F.J. Liantluanga, Addl. DC leh Dist. Level Census Officer chuan hawngin Pu H. Laldinpuia, Inspector of Statistic, IDCS chu Master Trainer a ni.
Pu Liantluanga chuan hawnna thu sawiin, Hnahthial-ah hun rei tak a awm tawh avanga mahni khua ang mai a a ngaih thu sawiin, sorkar in Enumerator/Supervisor atana a thlan chhuah training a kal te chu India ram pum huap a thawktu mi nuai tel zinga tel an nih thu te leh an pawimawh zia te thahnem ngai tak leh uluk taka training hun chhung hmang turin  a fuih bawk a ni.  Pu Tluanga chuan Census pawimawh zia sawiin tunah pawh hian kum 2001 census kha rin reng ala nih thu te, tun a census kan neih mek pawh hi kum 2021 thleng rin a nih dawn thu te, central atang pawhin hetiang tho hian an rawn teh dawn a ni tih thu te, plan an siam reng reng hi population base a nih thin avanga data fel tak neih a pawimawh zia te leh chuvang chuan a mal te te a chhiar hi kan tihtur pawimawh tak a nih thu te, uluk tak leh a tha thei ang bera he census hi kalpui turin kalkhawmte a fuih bawk a ni. He training-ah hian Hnahthial bial chhunga khaw hrang hrang atangin Enumerator leh Supervisor mi 65 lai an tel thei a ni.