Vawiin khan Disaster Management Committee chu Secretary Pu Rohmingliana office-ah thukhawmin, Mizoram Disaster Management hna chak zawka kalpui theihna turin thawktu lakna tur sorkar laipuiin sum a rawn pek angin mi thiam tak tak lak tumin hma a la mek a. Sorkar laipuiin reilote chhunga hna chak taka thawk tur a duh avangin a rang thei anga chingfel nise tih a rel a. Mizoram District hlun pathum Aizawl, Lunglei leh Saiha atan District Field Offices 2 theuh leh Aizawl-a State Level a thawktu tur 2 lak an ni dawn a. Hei hian Mizoram chu lirnghing hlauhawm tak chhuah theihna hmun a awm a nih avanga lo inbuatsaihna kawngah hlawk taka thawh theih beisei a ni. Mipui vantlang pawhin chhiatrupna lo thleng thut thei laka lo inbuatsaih a tul a, chumi atan Disaster Management hnathawhte ngun taka lo ngai chang thin a duhawm hle.