2144/2023-2024

Hnahthial the 4th October 2023: Kumin Mizoram Legislative Assembly inthlanpui-a hman tur final electoral roll chu vawiin khan Mizoram District dangte rualin Hnahthial District-a 29-South Tuipui Assembly Constituency roll chu District Election Officer leh Bawrhsap ni bawk Pu Chuauhnuna chuan a tlangzarh a, political party hrang hrang aiawhte hnenah copy 2 theuh a pe chhuak nghal.

District Bawrhsap Pu Chuauhnuna chuan final roll tluang taka peihfel a ni ta chu lawmawm a tih thu a sawi a, inthlanna felfai tak neih a nih a, tangkai taka hman a nih theih nan duhsakna a hlan nghal a ni.

Vawiina tlangzarh tak final roll in a tarlan danin 29-South Tuipui AC-ah hian vote nei mi 16,294 an awm a, Mipa vote nei 8037 awmin hmeichhe vote nei 8257 an awm a ni. Service voters mi 87-te nen chuan vote nei zawng zawng chu 16,381 an awm a ni. Vawiina tlangzarh tak final roll-ah hian draft roll nen khaikhinin vote nei mi 419 in an pun belh a, za zela a punna chu 2.64 a ni. 29/9 Hnahthial IV Polling Station-ah voter tam berin mi 1222 an awm a, 29/22 New Kawnpui-ah tlem berin vote nei mi 56 an awm thung a ni.

29-South Tuipui AC final roll tlangzarhnaah hian District Bawrhsap, DEO Pu Chuauhnuna bakah RO leh Addl DC Pu Lalvenhima, ERO Pu Neng Thianlala, Election Officer Pu Lalbiakfela, SDC Pi Betty Lalrinfeli bakah Hnahthial a Political party aiawhte leh chanchinbumite an tel a ni.