1187/2023-2024

Hnahthial The 19th July 2023: Vawiin chawhma khan Hnahthial DC Conference Hall-ah India ram zalenna ni, August ni 15 a lo thleng tur lawm dan tur relin District Bawrhsap Pu R Lalremsanga kaihruainain sawrkar hotute leh NGO aiawhte an thukhawm.

Hun kaihruaitu Bawrhsap Pu R Lalremsanga chuan Independence Day chu India ram mipuite tan ni pawimawh tak a nih thu sawiin a lawmna pawh hlimawm leh urhsun thei ang bera hman nise a tih thu a sawi a, mawhphurhna nei hrang hrang leh chanvo nei tura ruatte chu Independence Day hlawhtling taka lawm a nih theih nana thahnemngai taka thawk theuh turin a chah a ni.

Vawiin thukhawm chuan Independence Day lawmna hmun atan HDFA Turf Ground ni se tiin chawhma dar 10 ah tan ni se tih a rel a. National Anthem sa turin Salvation Army Band emaw Police emaw ni se a ti bawk. Parade contingent 10 neih ni se tiin a hnuaia mi te hi beisei an ni:

a) Govt. M/S Hnahthial
b) Govt. H/S Hnahthial (2 contingents)
c) Govt. Southern H/S Hnahthial
d) Govt. HSS Hnahthial (2 contingents)
e) FD HSS, Hnahthial
f) Moriah Public School, Hnahthial
g) St. Stephen’s School Hnahthial
h) Govt. Indira M/S Hnahthial.

Meeting chuan parade rehearsal hun tur atan August ni 9-11 ni se a ti a, March-Past endiktu (judges) atan SP office in a ruat ang tih a rel bawk. Independence Day lawmna hun hman zawhah Khuallian leh sawm bik te pualin PWD Complex-ah thingpui inhona hun (VIP’s at home) buatsaih ni se tih a ni.

Vawiin thukhawm chuan kumina Independence Day lawmna hunah hian Hnahthial District tihmingthatute chawimawi nan lawmman pek leh ni se tiin zirlai tithate bakah district tana mi chhuanawm, mi huaisen leh bravery award dawngte hnenah chawimawina hlan ni se tih a rel bawk. Independence Day lawmna programme-ah hian EF & CC bultumin ram kang tur vengtha veng/khua hnenah lawmman pek a ni dawn a. Titha zual 3 thlanchhuahte hnenah pawisafai cheng 50,000, 30,000 leh 20,000 theuh hlan tur niin consolation prize mi 2 in an dawng bawk ang. Sawrkar department hrang hrangte hna chanpualte siamfel nghal niin, Independence Day ropui taka lawm a nih theih nan mahni chanvo theuh hneh taka hlen turin meeting chuan mawhphurhna latu zawng zawngte a ngen a , Independence Day chu India ram ni pawimawh bik a nih avangin sawrkar hnathawk, zirlai leh khawtlang mipuite chu he hun hi ngaipawimawha tel vek turin a sawm a ni.