1186/2023-2024

New Delhi, 19th July, 2023 : Dr R. Lalthangliana, Health & Family Welfare, Commerce & Industries leh Higher & Technical Education changtu Minister khan thil pawimawh chi hrang hrangah sawrkar laipuia thuneitu sangte a dawr kual.

Dr Thangtea hian nimin khan Asian Development Bank (ADB) hotute kawmin Sawrkar laipuiin an pawmpui tawh Mizoram State HealthCare Scheme tihchangtlunna tur cheng vaibelchhe 1000 chu a rang lama tifel turin a ngen a, ADB hotute chuan theihtawp an chhuah thu leh concept note pawh an buatsaih mek tih an lo hrilh a ni.

Hemi hnu hian Ministry of Micro, Small & Medium Enterprises (M/o MSME) tlawh lehin MSME Secretary thar SCL Das, IAS chu a kawm a, Mizorama MSME tihchangtlunna tur leh tihhmasawnna tur project hrang hrang an thehluh tawhte a umzui thu ministerin a sawi chuan Secretary chuan a hna thar a zawmna a la rei loh thu a lo sawi a, a hnuaia officer pawimawhte kokhawm nghalin an sawiho a, a chak thei ang bera hmalak chhunzawm an tum thu in a lo chhang a ni. Dr Thangtea hian MSME Secretary kalchhuak ta Dr BB Swain, tuna UPSC member ni ta chu a pisa ah tlawhin lawmpuina thu a hlan a ni.

Dr. Raj Kumar Ranjan Singh, Union MoS for HRD pawh tlawhin Mizorama Kendriya Vidyalaya Sangathan (KVS) engemawzat din dilna a thehlut a, rang taka ngaihtuah zui sak turin a ngen nghal a ni.

Dr Thangtea hian niminpiah khan Ministry of Home Affairs hnuaia Department of Border Management Secretary Atal Dulloo, IAS chu a pisa ah kawmin Kawrpuichhuah Integrated Check Post (ICP) tihpuitlinna tur a sum ruahman tawh cheng vaibelchhe 552 chu central cabinet pawmpui tura chhawp chhuak thuai turin a nawr a, Atal Dullo chuan kar hnih vel chiah tuna a hna hi a la thawh avangin a la thar deuh thu minister hi lo hrilhin uluk taka a lo zirchian tur thu leh a theih anga ranga lo bawhzui a tum thu in a lo chhang a ni. India leh Myanmar insumdawn tawnna hmunpui Land Custom Station (LCS) Zokhawthar leh Zorinpui sawrkar laipuiin a lo pawm tawh atana Detailed Project Report (DPR) siam chu tih thuai a ngai tih a sawi bawk aa, a rang thei ang bera buaipui turin a ngen a, theihtawp chhuaha lo enzui a tum thu in a lo chhang a ni.

Border Roads Organization Director General Rajeev Chaudhary chu a pisa-ah kawm bawkin Lunglei leh Lawngtlai district inkalpawhna atana pawimawh tak Tuipui ‘D’ Darzo kai lei dawhna tur cheng vaibelchhe 91 chuang saction awm tawh chungchang an sawipui a, Pu Rajeev hian a tul ang angte an buaipui fel tawh thu leh thuneitu sang lamah an thlen mek thu sawiin thla thar August kar hmasa ber a ral hma in engkim an tihfel theih a inrin thu in a lo chhang a.

Thingsai - Pangkhua inkalpawhna defence road BRO hovin an laih mek chu kilometre 21.38 hmabak a la awm tih a thlen chu Pu Rajeev hian National Highway single lane angin an chhunzawm tur thu leh hemi atan hian Ministry of Defence chuan cheng vaibelchhe 111 a ruahman tawh thu lo sawiin, thla 6 chhungin DPR peihfel tum a nih thu leh working season tharah hna thawh tan hman tumin an inruahman tih a lo sawi a ni.