Vawiin khan India Independence Day vawi 69-na chu Hnahthialah HBSC Ground-ah lawmna neih niin Pu TT. Zothansanga, Parliamentary Secretary chu khuallian a ni.

Khuallian Pu TT. Zothansanga chuan Hnam puanzar pawt parhin hemi hnu hian thusawina a nei a, India ram zalenna tura thi leh thau pawlha lo beitu Mahatma Gandhi te, Jawaharlal Nehru te leh Subash Chandra Bose te zarah zalenna ropui tak nei an nih thu sawiin Zalenna hi a hlu a, Independence neih harsatzia hre chiangtu ber chu Mizote kan ni a, kan han bei ve ngial chung pawhin kan thei lo a ni a, chuvangin zalenna kan neih hi kan hlut thiam a pawimawh hle a ni a ti.

Khuallian chuan zirlai kalkhawmte fuihin kan ram leh he Hnahthial khua ngei pawh hi in kutah a la awm dawn a, chumi atan chuan tun atanga inbuatsaih a pawimawh a ni a ti a, tunlai khawvel thiamna Information technology lama hma kan sawnna te hi hmang thiam lo tan chuan chhiatna thlentu a ni a, a hmang thiam tan chuan a tangkai em em a, heng kan vanneihna te hi zirlaiten hman thiam a pawimawh hle a ni tiin kan van neihna hi kan hmang thiam tur a ni a ti bawk. Tun atanga kum 10 a ral leh chuan hlawhtlin tum vek zirlaite hi in inthlau leh hle dawn a, a hnufual bika awm tum loh tur a ni a ti bawk.

Khuallian chuan sawrkarin a ngaihpawimawh em em chu dan leh thupek kenkawh a nih thu sawiin hemi avang hian India ramah state ralmuang ber pawl kan ni tiin hemi kawnga kut leh ke ber Police te pawh thuam that zel an tum tur thu sawiin dan leh thupek kenkawhna lama awlsam zawka hna an thawh theih nan Aizawl klhawpuia hmun engemawzatah pawh CCTV vuah a ni tawh a ni a ti bawk. Mi hausa leh mi rethei inkar zau lutuk a hmuhin  Chief Minister  Pu Lal Thanhawla chuan mi rethei ten lei rem an rah ve nan NLUP a duang a, chu chu kan tangkai pui em em a, mi tam takin sawisel thin mah se UNO lam atang pawhin tha an tih avangin Memorundum of Understanding (MOU) te min ziahpui tawh a, an ni mai bakah hian Tata Trust te pawhin MoU hi min ziah pui tawh bawk a ni a ti. Tunah chhungkaw 90395 ten NLUP la tawhin tunah hian a bak sem leh tura ruahmanna kalpui mek a ni tiin a dawngtu mipuiten tangkai taka an hman chuan hei hikanram dinchhuahna tur a ni a ti. Mi thenkhatin chumi khami khua kudam a ruak an ti a, mipuite kan chi ai leh mai thin a, chi ai loh tur a ni tiin buhfai hi a lo thleng a, an sem zo leh nghal zel avangin manganna tur a awm lo a ni a ti a, Food Security kan hmang dawn a, Mi retheiteah buhfai man tlawma pek a ni a, abak chu sawrkarin mawh a phur tawh loh laiin kan sawrkar chak tak chuan theihtawp chhuahin kan mite riltam hlauvin a bei a, chumi avang chuan buhfai pawh kan hnianghnar hle a ni a ti bawk. Hnahthial khuaa Official te leh hruaituten a hnenah mamawh an sawi tih sawiin Hnahthial Supply Godown pawh a enfiah tih a sawi a, khawtlang hruaitu ten khawtlang mamawh an thlente a theih ang anga tihhlawhtlin a tum thu a sawi bawk.

Khuallian hian Parade Contingent 13 ten hnam puanzar chibai an buk chhanglet nghalin hemi hnu hian naupanmgte hnenah sweet sem a ni a, Gov’t H/S Hnahthial leh MMES zirlaiten Special item hmuhnawm tak an entir a, hemi hnu hian khuallianin March pass-a lawmman dawngtute hnenah lawmman semna a nei nghal a ni. Hetiang hi lawmman dawngtute chu an ni : 1st -Gov’t High School; 2nd -English Congregation School leh 3rd -Mantawni Memorial English School.