Ram chhung leh state chhung hmun dang rualin vawiin khan Independence Day vawi 69-na lawmna chu urhsun takin Tumpui Playground, Kolasib ah neih a ni a, khuallian Education Minister Pu H.Rohluna chuan hnam puanzar pawt pharhin Parade Contingent 14 te zahna chibai a changlet a ni.

Pu H.Rohluna chuan kan ram in ram dang awp behna lak atanga zalenna a hmuh ni, mahni ke a ding tura bul a tan ni a ni tih hrerengin, zalenna kan hmuh theihna tura mittui leh thisen hlantute rilru leh duhthusamte tihlawhtling tura kan in hlan thar a tul takzet a ni, a ti a. Remna leh muanna boruak vawnghimte, vantlang himna leh, dan leh thupek kenkawhte chu Sawrkar ngaihpawimawh berte zing a mi a ni tiin dan kengkawhtute, tlawmngai pawlte, Kohhrante, thuthar thehdarhtute leh mipui vangtlang thawhpuina a zarah Mizoram chu ram pum a State muanawm berte zingah kan vawng thei a ni, a ti bawk.

Sawrkar Flagship Programme, New Land Use Policy (NLUP) chuan ei leh bar zawnna kawngah hmasawnna tam tak a thlen mek zel thusawiin NLUP hian kut hnathawk a eizawng thin te tan eizawnna ngelnghet leh rintlak zawk siamsak in, tlangram loneih nasa takin a titlem a ni, a ti a. NLUP chungchangah United Nation Agencies hrang hrang UNDP, UNIDO, FAO leh ILO te leh Tata Trust te nen thawhhona thuthlung ziah a nih tawh thu a tarlang.

Buh leh thlai tharchhuah tipung turin Sawrkarin nasa takin tan a lak thu sawiin Kolasib District chhungah Power Tiller loneitu 60 hnenah Subsidy-in pek a nih thu te, Tracktor leh leilehna hmanrua hawh theihna tur hmun Custom Hiring Centre pawh hmun 7-ah ruahman mek a nih thu te leh Bukvannei-a Oil Palm hriak herna khawlah Oil Palm hriak 3400 Qts lai herchhuah a nih tawh thu te a tarlang bawk.

Education Minister chuan zirna hi hmasawnna bul pawimawh tak anih avangin Sawrkar chuan tihchangtlun nan theihtawp a chhuah reng thu sawiin Sawrkar enkawl Sikul a thawk zirtirtu la training lo te an training vek theih nan 2014-15 session atangin District tina DIET-ah te In-service Training neih a ni a ti a. Tun Academic Session atangin Pawl 1 atanga Pawl 4-ah zirlaibu thar hman tan a ni a. English leh Mizo Medium Sikulah te zirlai inang hman a ni a. Nakum 2016-2017 session atangin pawl 5 atanga pawl 8 pawh hetianga kalpui tum a ni, a ti. Treasury Square Aizawl-ah Education Center Building cheng nuai 800 senga sak tan thuai tum a nih thu te, District tina DIET 8-te tihchangtlun nan building sak mek zel anih thu te leh Lawngtlai, Mamit leh Lunglei District-ah te Special Literacy Drive uar lehzuala kalpui mek a nih thu te a sawi a. Tun Academic Session atanga Sikul kal leh ban hun darkar 1 a sawm hmaa, zirtirtute, zirlaite leh nu leh pa te thlawpnaah lawmthu a sawi bawk a ni.

Pu H.Rohluna chuan ramri hrula insumdawn tawnna mumal taka kalpui anih theih nan Sawrkarin chak takin hma a lak zel thusawiin Zokhawthar Land Custom Station chu March ni 25, 2015 khan Union Minister of State for Commerce & Industry Pi Nirmala Sitharaman-in a rawn hawn thu te, Myanmar ramri hrulah Border Haat (Trade) hmun 5-ah din turin hmalak mek a nih thu te leh Bangladesh lam ramri hrulah pawh Integrated Check Post (ICP) Kawrpuichhuah-ah din turin chak tak hmalak mek a nih thu te a tarlang bawk. Gas leh oil zawnna ah Sawrkarin ngawrh takin hma a lak zel thusawiin oil leh gas zawnchhuah hna thawk Company atangin hian Mizoram Sawrkarin Licensing Fee cheng nuai 1888 a tel tawh a ni, a ti.

Pu H.Rohluna chuan Handloom lam hmasawnna turin Sawrkarin chak takin hma a lak thusawiin Cluster Development Project-ah Mizoram tan Cluster 17 Sawrkar laipuiin min pawm sak a, cheng nuai 1644 senna turah cheng nuai 358 min pe tawh a ni, a ti a. Mizoram Handloom Export Facilitation Hub, Thenzawl-ah din turin chak takin hma lak anih thusawiin hei hi peih anih hunah chuan State pawn leh ramdangah puantahtuten an puantah an thawn chhuahna hmunpui tur a ni, a ti a. Apparel & Garment Production Centre, Industrial Growth Centre Lungmual-a dinna tur kumin July ni 3 a Union Minister of State for Textiles Pu Santosh Kumar Gangwar-in a lungphum a rawn phum chu kumin chhung hian peih hman tum a ni, a ti bawk.

Mizoram Institute of Medical Education & Research (MIMER) din nan State Referral Hospital Falkawn chu cheng vaibelchhe 189 seng a tihchangtlun tumin hmalak mek a ni thu leh nakum chhungin doctor zirlai 100 nen bul tan theih beisei a nih thu te a sawi a. Food Security Act chu October 2015 atanga hman tan a nih tur thu leh Food Security Act-in a huam ve loh te pawh tuna ration kalpui dang ang hian Sawrkarin mipuite tan ruahmanna a siam thu te a sawi bawk a ni.

Vawiin Independence Parade ah hian a vaiin Contingent 14 an awm a, Armed Contingent 1, Unarmed Contingent 4, School Contingent 9 leh Band Party 1 an awm a. Unarmed Contingent a pakhatna chu Mizoram Excise & Narcotics Contingent ; pahnihna Govt. Diakkawn High School NCC Air Wing Contingent leh pathumna chu St. John’s Higher Secondary School Boys and Girls NCC Contingent te an ni a. School Contingent a pakhatna chu Jawahar Navodaya Vidyalaya, Thingdawl; pahnihna CM High School leh pathumna chu Govt. Diakkawn High School te an ni.