1444/2023-2024

Hnahthial the 10th August 2023: Vawiin chawhma khan DC Conference Hall Hnahthial-ah District Bawrhsap Pu Chuauhnuna chuan India Independence kum 75 lawmna "Azadi Ka Amrit Mahotsav" hmawr bawkna atan sorkar laipuiin programme a duan "Meri Maati Mera Desh" Campaign a hawng.

Campaign hawnna inkhawm hi Pu Lalvenhima, Addl. DC in a kaihruai a, campaign hawngtu Pu Chuauhnuna chuan sorkar hmalaknate tha taka zawm chu mitin mawh a nih thu sawiin tuna hmalakna pawh theih tawp chhuaha tihhlawhtlin a tul dawn a ni a ti. Hnahthial chu District a hlankai a ni tawh a, hmasawnna pawh tam tak thleng mek zelin nasa leh zuala a thlen theih nan tanrual a tul hle dawn a, sorkar hotute thu zawm chu hmasawnna leh changkanna a ni tih hre reng tura kalkhawmte chahin campaign a hawng a, a kaihhruainain thutiam lak chhunzawm a ni bawk.

He hunah hian Pu Lalbiakfela, BDO leh Pi Betty Lalrinfeli, SDC ten Meri Maati Mera Desh campaign thiltum leh tih tur hrang hrangte an sawifiah a, Hnahthial District chhungah freedom fighter chawimawi tur Defence-a thawk ram tana nunna hlu tak hlantu mi pali (4) Pu Zachhunga, Thingsai; Pu Pazawna, Cherhlun; Pu Lawmzuala, South Vanlaiphai leh Pu Lalngaizuala, Electric Veng Hnahthial-te an awm tih tarlan niin chawimawina thil pek hun remchangah hlan an ni ang. Pu Ngenthianlala, SDO Sadar chuan lawmthu sawiin hun a khar a ni.

Campaign hawnna hunah hian DC office-a officers te, Project Director DRDO, CDPO, Hnahthial khawpui chhunga VCP , MJA member, Sub Hqrs YMA, MHIP leh MUP hruaitute an tel a ni.