3893/2023-2024

Hnahthial the 20th February 2024: Vawiin khan Hnahthial-ah Mizoram chhunga District dangte rualin DC Conference Hall, Rallang tlang-ah Mizoram State Day, 2024 lawmna hun hman a ni a, he hun hi Hnahthial District Addl DC Pu Lalvenhima chuan kaihruaiin District Bawrhsap Pu Chuauhnuna chu Khuallian a ni.

District Bawrhsap chuan kalkhawmte chu State Day chibai bukin Mizo te tan State day chu ni pawimawh em em a ni a ti a, State day puala hun hman a ni chu lawmawm a tih thu a sawi. Mizoram in State dinhmun a luah chhoh dan tarlangin kum 1972 ah UT a hlankai a ni a, Remna thuthlung kum 1986 a ziah a nih hnuah kum 1987 khan Mizoram chu State puitlinga hlankai a nih tak thu a tarlang. Khuallian chuan state puitling a nih tak hnu ah Mizoram chuan hmasawnna hmel a hmu nasa hle a ti a, chhungkua, khawtlang leh ram pum huap pawhin hmasawnna hmuh tur a tam hle tiin sawrkar mai bakah Khawtlang mipuite thawh rah a ni, a ti. Sawkar hna thawk kalkhawmte chu an hna thawh chhan hre thar leh turin a ti a, mipui tana thawk an nih angin theihtawp chhuaha, khawtlang leh ram tan an theihna hmang theuh turin a chah. khuallian Pu Chuauhnuna chuan Sawrkar hna thawkte chuan CCS conduct rules in sawrkar hna thawkte awmdan tura a tarlan- rinawmna, dikna, felna vawn nun te, mahni hnaa inpumpekna te, sawrkar hna thawk tiha mawilo engmah tih loh tur te, thawh chhan mipuite mithmuha mawilo a awmlo tur te a chahin, tawngkam hawihhawm in mi thinlung a hneh fo zia te hre thar leh turin a chah. Langtlang taka hna thawk a, mawhphurhna la ngamtu ni theuh turin a chah bawk a, thutlukna siam reng rengin mipui vantlang hamthatna tur ngaituah fo turin leh sum leh pai ah rinawm tlat turin a fuih bawk. CSS conduct rules a kaihhruaina awm te chu Mizo zia nen pawh a in kalh lo hle a ti a, sawrkar hna thawk te chuan an thawh chhan mipui ngai pawimawh theuh se, ram chuan tun aiin hma a sawn zual zel a rin thu sawi bawkin kalkhawmte chu state day hlimawm tak hmang theuh turin a chah a ni.

Vawiin State Day lawmna ah hian Sub Hqrts YMA Hnahthial President Pu B Lalhmingliana pawhin thusawina hun a hmang bawk a, Pu Lalbiakfela, BDO chuan lawmthu sawiin hun tawp a khar. District chhunga pisa hotu hrang hrang te bakah, NGO aiawh te, zirtirtute leh chanchinbumite a tel bawk.

Vawiin State Day pual hian Hnahthial North II VC Mual, Bazar-ah State day of Prayer (Ram tana tawngtai rual ni) hman nghal a ni a, sual thu pha chawina, lawmthu sawina leh malsawm dilna neiin Hnahthial District mipui tam tak kalkhawmte chuan thahnemngai  takin ram tan tawngtai rualna an nei nghal bawk.