3894/2023-2024

Dated Siaha 20th February 2024: Tukin zing dar 7 khan State Day of Prayer Committee (SDPC) Siaha District - bultumin 'Mizoram State Day of Prayer' chu Siaha Vaihpi Playground- ah hman a ni a, Rev.C. Beima, Chairman, SDPC chuan tawngtaihona hi a kaihruai a ni.

Pu Lalhmunsanga Hnamte, District Bawrhsap chuan 'State Day of Prayer' hawnna thuchah a sawi a. Mizoram sawrkarin State Day lawmna atana ram pum huap tawngtaina hun hmang tura ruahmanna a siam chu lawmawm a tih thu a tarlang a. Mizoramin harsatna tamtak paltlangin State puitling a hmu a ni tiin theihtawp chhuaha tha leh zung sengtu zawng zawngten fak an phu takzet a ni, a ti. Remna hi a hlu em em a, remna tel lovin ramin hma a sawn thei lo tiin February ni 20, kum 1987-a State puitling kan nih hnu khan District dangte rualin Siaha District ngei pawhin hmasawnna tam tak kan hmu a, heihi thil hlu leh chhinchhiah tlak tak a ni a, State puitling nih hlutzia tilang chiangtu pawimawh tak a ni, a ti.

Pu Lalhmunsanga Hnamte chuan Pathian hnena sual ngaihdam dil leh inhlan tharna neih chu thil tangkai tak a nih rualin mahni theuh in enfiah a ngai hle a ti a. Pathian malsawmna dawng turin mihringte hian tih ve tur tam tak kan nei a , mahni kan pawimawh em em a, mitinin kan tih turte dik leh tha taka tih hi a pawimawh hmasa a ni, a ti. Vawiina ram pum huap tawngtaina neih hian mitin thinlungah a tharin thu lo sawi se tiin Pu Lalhmunsanga Hnamte chuan Siaha mipuite chu ram leh hnam tana theihtawp chhuah a, Pathian hre reng chunga hmalam pan zel turin a sawm nghal bawk.

Mizoram State Day of Prayer - hmannaah hian thupui thlan bik neiin tawngtairualna vawi thum neih a ni a. Rev. Lalchhuankima , BCM - chuan 'Sual ngaihdam dilna' tih thupui hmaning tawngtai a kaihruai a. Major. T. Zothanmawia, Salvation Army, chuan 'Pathian hnena lawmthu sawina' tih thupui hmangin tawngtai kaihruaiin 'Inhlan tharna' tih thupui hmanga tawngtaihona chu Rev. B. Vannunsanga, LIKBK chuan a kaihruai bawk.

Tukin zinga 'Mizoram State Day of Prayer' hmannaah hian 'Gospel Outreach Ministry' leh R. Lalchansangi hnen atangin fakna hla ngaihtlak a ni a. Rev. Chhuakhu Khithie, Working Chairman, SDPC chuan lawmthu sawina neiin, Rev. Hmingthansanga, PCI, chuan malsawm tawngtainain hun a khar a ni.