3895/2023-2024

Dated Serchhip, the 20^th February, 2024: Vawiin khan Mizoram State Day vawi 37-na chu Serchhip DC Conference Hall ah Bawrhsap Pu David Lalthantluanga hovin lawm a ni a. Official function neih a nih hnu hian Serchhip Auditorium ah ram tana tawngtai rualna “State Day of Prayer” chu State Day of Prayer Committee buatsaihin hman chhunzawm a ni.

DC Pu David Lalthantluanga chuan State puitlinga hlankai kan nih hnuah Mizoramin hmasawnna tam tak kan hmu a, kum engemawzat State ralmuang ber dinhmuna kan ding chho thei hi a lawmawm hle a; State nihna hi kan ngaihhlut thiam a, ralmuanna kawngah chauh lo pawh State dangte tana entawn tlaka inpho chhuah kan tum zel a pawimawh a ni, a ti. Kum 37 zet State puitling dinhmuna kan din hnuah hmasawnna tur erawh kan la ngah hle a, taima taka hna kan thawh a, dik leh rinawm taka thil kan tih phawt chuan intodelh tur leh, tun aia chak zawka hmasawn tur hian theihna kan nei a ni tih hre turin kalkhawmte a chah a. Sawrkar hnathawk te mai bakah tlawmngai pawl, Kohhran, Political Party, Chanchinbu mite leh mimal tin ten kan hma zawna mawhphurhna leh theihna kan neihte ram tan thahnem ngai taka hlen chhuak a; taimakna, rinawmna leh dikna nen ram leh mipuite hmasawn nana atana tan la zel turin a fuih a ni.

State Day lawmna official program hi Additional DC Pu James Lalnithanga’n a kaihruai a. Pi Rebecca Laldinmawii Hrahsel, SDO (Sadar) chuan lawmthu sawina hun a hmang a ni.

State Day of Prayer Committee thukhawmin a lo rel angin chhun dar 12 a tanin tlai lam thlengin State Day of Prayer hman zui a ni a. Hun thumah then niin a thawhkhatna leh hawnna inkhawm ni nghal bawkah hian Serchhip DC Pu David Lalthantluanga, State Day of Prayer Committee Patron ni bawk chuan hawnna thuchah tawi a sawi a. State puitlinga hlan kai kan nih dan leh Pathian malsawmna avanga tun dinhmuna ding thei kan nih dan te, kum dang ang lo taka he ni ram tana tawngtai rualna hun atana hman ni se tia rawtna lo chhuah dan te a sawi a. Sual thuphachawina, inhlan tharna leh Pathian hnena lawmthu sawina hun a nih ang ngei a thinlung leh tihtakzeta Pathian pawlna hun hmang turin kalkhawmte a chah a ni.

Tawngtai rualna programme hi tum thum neih a ni a. Hun hmasa ber hi Rev.Laltanpuia Colney, Baptist Kohhran chuan kaihhruaiin “Sual ngaihdam dilna” tih thupui hmangin tawngrai rualna hun an hmang a, Pastor C.Lalchhuanga (UPC NEI) chuan thuchah tawi a sawi a. A hun hnihnaah hian “Pathian hnena lawmthu sawina” hun hman niin Rev C.Lalneihthanga, Isua Krista Kohhran chuan programme a kaihruai a, Pastor Challiandinga Hnamte (Seventh Day Adventist) chuan thuchah tawi a sawi a. A hun thumna leh kharna hun hi Rev.Rolungmuana Zadeng, Presbyterian Kohhran chuan a kaihruai a, tawngtai thupui atan “Inhlantharna/Inpumpekna” tih chu hman a ni a, Capt. Vanlalthazuala (Salvation Army) chuan thuchah tawi a sawi a. A tawp kharnaah hian State Day of Prayer Committee Working Chariman Pu Kawlthuama, Sub Hqrs. YMA President ni bawk chuan thu a sawi a ni.