3896/2023-2024

2024 Ramtuk thla ni 20: India ram state puitlinga Mizoram hlan kai a nih ni, Mizoram State Day vawi 38-na chu vawiin khan I&PR Conference Hall, Kolasib-ah lawm a ni a. District Bawrhsap Pu John LT Sanga chu Khuallian a ni.

Khuallian, Kolasib Bawrhsap chuan District mipuite State Day chibai bukin, state nihna chu awlsam taka neih mai theih a ni lo va, tha leh zung, ngaihtuahna, thlan tui leh thisen tam tak senga harsa taka sual chhuah a ni, a ti a. State nihna hmu tura a kalkawng hautakzia hria a, state nih hlutna hre thar leh turin mipuite chu a chah a. Mizoram humhim leh tihhmasawn te, state nihna vawn nun zel te chu khua leh tui zawng zawng mawhphurhna a nih thu sawiin, Mizoram state zalen leh ralmuang a nihna chu a ṭha zawnga hmasawn nan hman thiam a pawimawh thu a sawi.

Kolasib-a State Day lawmna hun hi Kolasib DRDO Project Director Pu Lalmuan Puia chuan a kaihruai a. The Salvation Army Kolasib Corps Commanding Officer Maj. R. Lalchhuana'n hunserh hmangin, Kolasib District Local Administration Officer Pu ST Lalhmingmawia'n inlawmna thu a sawi a. Kal khawmte'n Mizo Hnam Hla, "Ro Min Relsak Ang Che" tih an sa rual a. Kolasib All NGO Coordination Committee Chairman Pu Thomas D. Lalengliana pawhin thu sawiin, Mizoramin India rama state ralmuang ber nihna a luah chu a chhuanawm tak zet a, he nihna humhim zel tur hian keimahnia ṭhatna thuruk awm hi kan tinung reng tur a ni, a ti a. Mipuite chu khua leh tui ṭha nih tum ṭheuh tur leh ṭha taka dan leh thupek zawm zel turin a chah a ni.

He hunah hian rambuai hun khirhkhan pal tlanga kum 1986 June ni 30-a MNF (Mizo National Front) leh India sawrkarin Remna Thuthlung (Peace Accord) an ziah fel hnua, India Danpui 53rd Amendment (Article 371G) kal tlanga kum 1987 February ni 20-a Mizoramin state nihna a neih chhoh dan tar lanna video, Kolasib District Information & Public Relations Office-in an buatsaih chu thlir ho a ni a. Zaithiamte zai ngaihthlak ni bawkin, Additional Deputy Commissioner Pi Melody Ngurthantluangi'n lawm thu sawiin hun a khar a ni.

Vawiina Kolasib-a State Day lawmnaah hian sawrkar official-te, tlawmngai pawl hruaitute, kohhran hruaitute leh chanchinbu mite an tel a ni.

State Day lawmna hun hman zawh hian Kolasib Kohhran Hruaitute Committee (KKHC) huaihawtin Kolasib Ṭumpui Field-ah ram tana ṭawngṭai hona hun, State Day of Prayer buatsaih zui a ni a. KKHC Treasurer Upa C. Lalbiakthanga chuan hun kaihruaiin, KKHC Vice Chairman Rev. Joe Laldinpuia, BCM Kolasib Pastor Bial chuan hun hman chhan leh ṭawngṭai thupui a sawi hawng a. Mipui kal khawmte'n thupui hrang hrang - sual thupha chawina, lawm thu sawina, inhlan tharna leh ram hruaitute tan tih te hmangin chhawng liin ṭawngṭai rualna hun hman a ni a. District Bawrhsap Pu John LT Sanga chuan a tawpah thu a sawi bawk a ni.