3897/2023-2024

Khawzawl, 20th February 2024: Mizoram State Day vawi 37-na chu Mizoram hmun hrang hrang te rualin Khawzawlah pawh urhsun leh ropui taka lawm a ni a. State Day pualin vawiin chawhma dar 10:00 khan  DC Conference Hall, Khawzawl Dintharah inkhawm tawi hman a ni a; he mi hnu hian chawhma dar 11:00 atangin Mualvawm Ground-ah tawngtai rualna hun hman a ni.

Khawzawl DC Conference Hall-a hun hman hi Addl DC Pu Lalfakzuala chuan a kaihruai a, Mualvawm Ground-a tawngtai rualna hun hi Khawzawl District State Day of Prayer Organising Committee Chairman Rev. David Saithuama Pachuau chuan a kaihruai thung. Khawzawl DC Pu K. Lalrohlua chuan DC Conference Hall-a kalkhawm sawrkar hnathawkte hmaah thu a sawi a, tawngtai rualna hunah hian inkhawm hawnna thuchah (Inaugural Address) a sawi bawk.

Pu K. Lalrohlua chuan Mizoram chu MNF leh India sawrkar laipuiin inremna thuthlung an ziah hnuah India ram danpui a vawi 53 na atan tidanglamin, India state 23-na ni turin kum 1987 khan state nihna pek a nih thu a tarlang a. State dang te neih ve loh Article 371G Mizoramin a nei chu thil chhinchhiahtlak tak a ni tiin, sawrkar hnathawk kalkhawmte chu he dan bung hi uluk zawka zir chiang a, an nitin hnathawhna hmunah hnam ziarang leh tih phung vawng nung chunga hna thawk thin turin a chah a ni.

Khawzawl Bawrhsap chuan Khawzawl chu District khawpui fai ber dawttu a thlan a nih thu sawiin, District capital a nih ang ngeiin District chhunga khaw dang te tan pawha entawntlak ni turin Khawzawl mipuite a chah a. Khawzawl chuan ei leh bar zawnna, rinawmna, thianghlimna leh faina kawngah khaw dang te entawntlaka hma an hruai a ngai a ni, a ti.

Mualvawm Ground-a inkhawm hawnnaah pawh thu sawiin Pu K. Lalrohlua chuan Mizoram Legislative Assembly 9-na thutkhawm vawi khatna tlangkawmnaah Chief Minister Pu Lalduhawma chuan mifel famkim an awm loh thu leh tawngtai pui ngai an nih zia a sawi tih a tarlang a. CM thu sawi hre reng chungin, Mizoram leh ram hruaitute tan kalkhawmte chu thahnemngai taka tawngtai turin a ngen a, duhsakna a hlan nghal bawk a ni.

State Day of Prayer, Khawzawl Mualvawm Ground-a neih hi hun (session) then hniha hman a ni a. Chawhma hunah hian ‘Sual Ngaihdam Dilna’ hun hman a ni a, chawhnu lamah ‘ Pathian hnena lawmthu sawina, Inhlantharna leh Siam thar lehna’ tih thupui hmangin tawngtai rualna hi neih a ni thung. State Day of Prayer neihna hunah hian Khawzawl District chhunga Kohhran hrang hrang hruaitute, rawngbawltute leh mipui te an tel tha hle a ni.