3898/2023-2024

Dated Saitual the 20th February 2024: Vawiin Chawhma khan Mizoram State Day chu Govt Saitual College Auditorium ah hman a ni a, Saituala Sawrkar hnathawkte , MZI Saitual leh Sikul naupang thahnem tak an tel ani.

He hunah hian Khuallian Dr Lalngura Tlau, Saitual Bawrhsap chuan Mizo te chu hnam lian tak nilo, Mizoram a cheng phei chu vote nei chin pawh mi Nuai 8 vel lek, MP pawh pakhat chiah nei kannih avangin kan in pumkhat a tul takzet thu a sawi a. Mizo ten state kan neih theih na turin thil tamtak kan pi leh pu ten anlo paltlang tawh thu sawiin, khawchhak lam atanga lo thlangtla in 1895 ah British awpna hnuai ah awmin India in zalenna a lo neih khan Assam hnuaiah kan awm zui a, 1976 ah UT niin ram buai in min chim hnu reilo te ah 1987 ah state kan lo ni ta a ni, a ti.

Dr Lalngura Tlau chuan hun lo kal chho zel ah mahni nihna a chian lohna in Mizo te min tuam chho mek a ni,a ti a, nghenchhan tur zawngin kan buai a, a then Judaism ah in rin lutin thenkhat erawh sap leh korean culture tuipui em em kan awm bawk a ni,a ti. Heng te avang hian Mizoten hma kan sawn a kan inpumkhat a pawimawh takzet a ni a ti. Tumah hi Mizo ni turin kan in tilui thei lova, amaherawhchu kan hnam a hmasawn a ,muang taka kan awm zel chuan Mizo nihna chhal duhlo te pawh in Mizo nih chakna an rawn nei dawn a ni, a ti. Engtiklai pawh a remna leh muanna hlut zia hria a vawng nung zel turin kalkhawmte chu a chah bawk a ni.

State Day hmanna inkhawm a Chairman, Upa Lalzarmawia, Principal Govt Saitual College pawhin thu sawiin Mizo nih ropui zia kan hriat a pawimawh hle a ni, a ti a. Mizote tan Mizoram hlut zia sawiin, hnam dang nupui pasal nei te pawh in he Mizoram tho hian an lung a len leh thin a ni ,a ti. Zohnahthlak te chu Political Boundary in min then hrang mahsela kan thinlung ah erawh zai khat a luang za kannih thu a sawi bawk.

State Day hman zawh hian zing dar 10 ah Saitual Public Playground  ah a huhova tawngtai rualna hman a ni a. He hun hi Pastor Joseph Lalrammuana  BCM Saitual in kaihruaiin Saitual a kohhran hruaitu hrang hrang te, Zaipawl te,  Sawrkar Officials te leh mipuite a huhovin Sual ngaihdam dilna leh Pathian hnena lawmthu sawina tih thupui hmangin  Pathian hnenah sual thupha chawina leh Malsawm dil tawngtaina hun an hmang a ni.