Ni 3 awh tur sikul naupangte sikul chawlh lai denchhena, SDEO Office Hnahthial buatsaih 'Painting Exhibition cum Workshop' chu vawiin khan Govt. Middle School, Hnahthial-ah hawn a ni. He Exhibition cum Workshop-ah hian sikul naupang 49 bakah Art Education Teacher leh lemziak lama tui mi engemaw zat an tel a ni. Resource person atan Pu L.T. Zohranga, Zomoi Arts Lunglei chu hman a ni.

Exhibition cum Workshop hawnna inkhawm hi Pu R. Laldinliana BRCC, SSA chuan kaihruaiin thuhma a sawi-ah hetiang hun hi khawtlang-a buatsaih a nih vawi khatna a nih thu leh sum leh pai, tha leh zung tam tak seng a Sub-Divisional Education Officer office ten an buatsaih thei chu lawmawm a tih thu a sawi a. Tunlai zirna kalphung thar CCE te nen pawh a la inkaihhnawih chho vek a ni a ti bawk.

Pu C. Lalbiakzauva, SDEO pawhin hetiang thil an buatsaih chho dan te sawiin, Sorkarin art education a ngaih pawimawh thu leh Middle School-ah phei chuan hetiang lam zirtirtu tur bik rawih an nih dan te a sawi a, Arts hian a huam zau em em thil chi hrang hrang a huam a chung zing pakhat chu painting hi a ni a ti. Hemi hnu hian resource person L.T. Zohranga chuan a lemziah tawh rawn ken te sawifiahna leh entirna hun a hmang a.