Mizoram sorkar-in liam thama Rubber Plantation kalpui tura ruahmanna a siam ah hmalak ho dan tur ngaihtuahin vawiin khan Soil & Water Conservation Minister Pu J.H.Rothuama hovin Rubber Board of India hotute leh Mizoram sorkar hnuaia department kaihhnawih te Aijal Club-ah an thu khawm.
Pu J.H. Rothuama chuan kum 1960 bawr chho atanga Mizoram-ah rubber chin enchhinna neih tan a nih thu tarlangin Mizoram leilung ah hlawk taka chin theih a ni tih hriat ni mah se, rubber chi tha hmuh a harsat vang te, a hlawkna tel tura hun a duh vang te, a chin dan thiam tawk loh vang te in mi tlemte chauhvin rubber an ching a. Thenawm hnaia Tripura state in rubber chin hi a hlawhtlin pui hle avangin Mizoram sorkar chuan lian thama rubber plantation kalpui ve dan tur kawng a dap a. Governor Pu Vakkom Purusothaman leh Chief Minister Pu Lal Thanhawla hma lakna zarah Rubber Board of India hotute nen consultative meeting neih theih a lo ni ta chu lawmawm a tih thu sawiin scheme hrang hrang hnuaia Mizoram sorkar-in rubber chinna lian thama kalpui a tumna ah hian Rubber Board of India puihna a mamawh dawn a ni, a ti.
Rubber Board of India Chairperson Pi Sheela Thomas IAS chuan kum 1980 chho atangin Rubber Board of India chuan India hmarchhak bialah a hmalakna a sawrbing a. Tripura chu India rama rubber thar chhuak hnem ber pahnihna a ni tawh a. Mizoram ah erawh chuan Rubber Board hmalakna hian ram 1,000 Ha vel chauh a la khuh a ni, a ti a. Tuna Mizoram sorkar-in tih tak zeta rubber chin kalpui a tumah hian nursery dinna tur ah te, thiamna thar hmanga rubber chin ah te, loneitute tana subsidy pekna tur ah te Rubber Board chuan theitawpin a pui ang tih a sawi.
He meeting ah hian Pu P.L.Thanga IAS(Rtd), Member & Secretary, State Planning Board leh Pu L.R.Thanga IFS Principal Secretary, Soil & Water Conservation te pawhin rubber plantation-a hma zauh tura Mizoram sorkar in ruahmanna a siam te leh hlawhtling taka rubber plantation kalpui ve tura Mizoram mamawh te tarlangin thu an sawi a. Pu P.L.Thanga chuan NLUP hnuaiah rubber plantation chu ramngaw siam thar nan leh kut hnathawktute eizawn nan a pawimawhin kum 5 chhungin chhungkaw 3000 rubber ching tura thlan an ni, a ti a. A puitlin hma a loneitute in tun nun na tur ngaihtuah sak te, nursery changtlung din leh scheme dang te nena kal kawptir dan ngaihtuah te, Mizoram mamawh mila scheme kaihhruaina dan her danglam te chu rubber plantation hlawhtlin nan a tul a ni, a ti.
Mizoram ah hian rubber chin theihna leh a that duhna tur hmun 5,75,000 Ha vel lai a awm a. Soil & Water Conservation leh mimal hmalakna chu 50Ha vel chauh a la ni a. NLUP Phase I & II-ah 1,117Ha a zau hmalakna tura ruahman niin kum 2012-2013 atan NABARD hnuaiah 1,000Ha, leh RKVY hnuaiah 1,300 Ha bakah 12th Plan chhungin NEC hnuaiah 5,000ha a hma lak turin ruahman a ni.
