2184/2023-2024

Hnahthial the 6th October 2023: ‘Observance of Right To Information (RTI) Week 2023’ chu vawiin khan DC Conference Hall, Rallang Tlangah District Bawrhsap Pu Chuauhnuna hovin hman a ni a, Addl. Deputy Commissioner Pu Lalvenhima chuan he hun hi a kaihruai a ni.

RTI Week Observance programme-ah hian District Bawrhsap Pu Chuauhnuna chuan thu sawiin RTI chu langtlang sawrkar a awm theih nan te, sawrkar thuneituten an mawhphurna an hriat chian lehzual nan te leh hlemhletna (corruption) do nana hmanraw tha tak a ni a ti a; RTI Act chuan mipuite kutah thuneihna sang tak pein a tum ber chu sawrkar rorelna tha leh dik awm tir te, sawrkar langtlang, mahni mawhphurna hria leh rinawm tak din te a ni, a ti. Hlemhlet dona kawngah hmanraw tangkai tak a nih angin, sawrkar thuneitute pawhin he Dan avang hian an fimkhur zual phah fo chu lawmawm a tih thu a sawi bawk. Bawrhsap chuan RTI hmanga zawhna l?t thinte chu phurrit anga a lan chang awm thin mahse, dikna tundinna pawimawh tak a nih avangin sawrkar thuneituten theihtawp chhuah a tul hle a ti a. Vawiin inkhawm chuan vantlang mipuite tan awlsamna thlen se a tih thu sawiin hlawk taka hun an hman theih nan kalkhawmte duhsakna a hlan bawk a ni.

Hnahthial Government College Asst Professor Dr Lalrinpuia Vangchhia chuan ‘Rules & Responsibilities of SPIO/SAPIO’ leh ‘Online RTI-Mizoram’ tih thupui hmangin presentation a pe a, Pu Neng Thianlala, SDO (S) chuan lawmna thu sawiin hun tawp a khar a ni. Vawiina Observance of RTI Week-ah hian Hnahthial DC Pu Chuauhnuna, Addl DC Pu Lalvenhima, SDO (S) Pu Neng Thianlala, SDC Pi Betty Lalrinfeli bakah Hnahthial District huamchhunga SPIO/SAPIO te,VC aiawhte, NGO aiawhte, College zirlai aiawhte leh chanchinbumite an tel a ni.