2185/2023-2024

Khawzawl, 6th October 2023: Vawiin khan Khawhai Village Council buatsaihin Inter Village Volleyball Champion leh Khawhai Higher Secondary School Provisional Adhoc Grant in Aid a hlankai lawmna hun neih a ni a. He hun hi Deputy Chief Minister, Tuichang bialtu MLA ni bawk Pu Tawnluia chuan khuallian niin a hmanpui.

Khawhai Town Hall-a inkhawm neihah Pu Tawnluia chuan hlawhtlinna chang Khawhai VC Volleyball Team leh Provisional Adhoc Grant in Aid a hlan kai Khawhai HSS te a lawmpui thu a sawi a. Thalaite tuina leh mamawh tiphuisui zel turin theihtawp chhuah a tum thu leh bial chhung atanga ram pum huap inelnaa hlawhtlinna chang - Sialhawk football team te, Khawhai VC Volleyball Team te leh Khawzawl Vengthar FC te an awm chu lawmawm a tih tak zet thu a sawi bawk.

Khuallian chuan Khawhai leh Lungtan khua te tan a siam mek Phaisen tui lak chu kum 2023 Krismas hmain hawn theih ngei a beisei thu a sawi a. Khuallian hian Khawhai khuaa sawrkar department hrang hrang hmalakna pawh he hunah hian tarlangin - PHE Department, UD&PA, FCS&CA, Horticulture, Agriculture, Fisheries, Rural Development, DM&R, Health, PWD leh SASCE hnuai atangin cheng nuai 1000 chuang man hmasawnna hna thawh a ni tawh, a ti a. Khawhai Football Ground chu laih zawh thuai a nih a beisei thu leh Artificial Grass phah ngei a duh thu a sawi bawk.

Inkhawm hi Khawhai VCP Pu Daksiamliana chuan a kaihruai a. Pu David Malsawmtluanga leh Pu H. Ramhmingmawia ten Volleyball Team leh Khawhai HSS chungchang report pek leh lawmthu sawina hun an hmang a. Khawhai VC Treasurer Pu Rohlupuia Ralte chuan lawmthu sawiin inkhawm hi a khar a ni.

Khawhai HSS hi kum 2008 khan khawtlang enkawlna hnuaiah din a ni a. Kum 13 chhung chu Khawhai khawtlangin cheng nuai 103 chuang thawhkhawmin an lo enkawl tawh a. Khawhai HSS atang hian zirlai naupang 432 in pawl 12 exam bei tawhin, zirlai 363 in hlawhtlinna an lo chang tawh a ni.

Mizoram Volleyball Association buatsaih Inter Village Volleyball Tournament-ah hian Khawhai VC Team te hian finalah Hunthar LC Team te chu  12-25, 25-15, 25-13, 25-21 a hnehin an champion a ni.