2186/2023-2024

Dated Serchhip, the 6th October, 2023: Vawiin khan Serchhip District ah RTI Week puala hun hman a ni a. Serchhip DC Pu David Lalthantluanga, IAS chu khuallian a ni.

Pu David Lalthantluanga chuan RTI Week chu kan ramah RTI a pawimawhzia lantirna tur leh RTI chungchang mipui mimir leh official te pawhin kan hriat zau a, kan hman tangkai thiam theihna tura inzirtirna hun atan hman thin a ni, a ti. India ram chu khawvela democracy ram lian ber a ni a, ram Danpui tha tak kan nei a, he Danpui hi kan ram hruaitu hmasa ten rilru leh ngaihtuahna zau taka sengin, hnam hrang hrang, tawng hrang hrang, culture hrang hrang neite phuarkhawm tu, Constitution tha tak an duang chhuak a ni, DC chuan a ti a. Right to Information hi Constitution ah ziah lan ni lo mah se, he Constitution a tum bulpui atanga la chhuakin kum 2005 atang khan RTI Act hi siam leh hman tan a lo ni ta a ni, a ti.

RTI Act hman a nih atangin kum 18 a liam ta a, chu Act chu society ah inchiahin mihring te khawsak phung leh hmasawnna a zir zelin Dan pawh her rem leh tihphuisui chhoh chhunzawm zel a ni, khuallian chuan a ti a. Tunah chuan Sawrkar Department leh PSU te chauh ni lo, Village Council thleng pawhin a huam tawh a ni, a ti. DC Pu David Lalthantluanga chuan mipuiten sawrkar atanga an hriat duh apiang an hriat theihna hmanrua RTI hi langtlang sawrkar siamna tura thil pawimawh, sawrkar khalh ngiltu leh sawrkar tha siamtu hmanraw tangkai tak a nih avangin mipuite chu RTI hmang uar deuh deuh turin a chah a ni.

RTI Week hi October 5- October 12, 2023 chhungin India ram pumah hman a ni a. A lawmna pui ber chu Aizawlah neih niin District Headquarters tinah he hapta chhung hian RTI Act pualin hun an hmang vek dawn a ni.

Serchhipa RTI Week puala programme buatsaihah hian Pu Stephen Laltlansanga Auhmun, ARDO leh Master Trainer on RTI chuan RTI Act kalphung leh hman dan tur te, mipui lam leh a pe chhuak tu tur Department hotute mawhphurhna chi hrang hrang te kalkhawm te a zirtir a ni.

Programme hi Additional DC Pu James Lalnithanga’n a kaihruai a. SPIO, SAPIO, khawtlang hruaitute, tlawmngai pawl hruaitute, Journalist te leh zirlai thahnem takin he hun hi an hmang a. Serchhip DIPRO Pi Lalnunmawii’n lawmthu sawiin hun hnung  a khar a ni.