2187/2023-2024

Aizawl, the 6th October 2023 : Rural Development Minister Pu Lalruatkima’n vawiin khan Mizoram State Rural Livelihoods Mission (MzSRLM) in Self Help Group ten an thilsiam phochhuahna leh zawrhna hmun SHG Mart Lianchhairi Run Building Ground Floor (Horticulture Department bul) a buatsaih thar a hawng.

Pu Lalruatkima chuan MzSRLM chu kum 10 chauh upa nihmahse thingtlang mite dinhmun chawikanna kawngah leh an tan eizawnna kawng kawhhmuh leh siamsak kawngah te Self Helf Group kaltlanga nasa tak an thawhna chuan rah tha duhawm tak a chhuah mek thusawiin hei hian Mizoram kan ei leh bar dinhmun leh kuthathawktute leh kuthemthiamte sum lakluh a tipung a ni, a ti. SHG avanga mimal hawltling chanchin thenkhat sawiin Minister chuan MzSRLM hian eizawnna kawng lamah chauh thingtlang a chengte hi hma kalpui lovin sum leh pai enkawl leh vawn te an zirtir bawk a, hei hian nasa takin an mahni a chona siamin ngaihtuah thar a pe a, chu chuan an mahni a tumruhna leh taimakna te tuhin an hlawhtling ta a ni, a ti.

Self Help Group te thilsiam leh dehchhuah phochhuahna leh hralhna hmun, khawpui laili lai taka hmun remchang tak SHG Mart buatsaih chu lawmawm tiin thilsiam tute tan malsawmna a nih bakah Mizo thil siam leh dehchhuah lei duhte leh khualzin te tan hmun tlawh chak tak a nih ngei a beisei thu a sawi a. Self Help Group te thil siam chu quality tha leh belchian dawl anih a pawimawh thusawiin an thil siam reng rengah hei hi ngaipawimawh leh rilru a dah reng turin a chah a ni.

SHG Mart hawnna inkhawm hi Pu Zarzosanga, IAS, Secretary, RD Department in kaihruaiin Pi H Lalchhandami, CEO MzSRLM chuan an hmalakna tlangpui te a sawi a, Pu V. Lalengmawia, Joint Secretary, RD Department in lawmthu sawiin hun a khar a ni.

Mizoram pumah hian Self Help Group 10708 an awm mek a, heng member zat hi mi 84169 an awm mek a. An chungah hian an mahni khaikhawmtu Village Organization 735 leh Cluster Level Federation 52 a awm mek bawk a ni.