2188/2023-2024

Aizawl, the 6th October, 2023: Tukin khan Sports & Youth Services, Tourism leh ICT changtu Minister Pu Robert Romawia Royte, Aizawl East-II bialtu MLA chuan a bial chhunga Sawrkar hmalaknaa hnathawh hrang hrang 6 hawngin hmasawnna ruhrel thawh leh tur 4 dang lungphum a phum nghal bawk.

Aizawl East-II bialtu MLA leh Minister ni bawk Pu Robert Romawia Royte chuan Covid-19 hripui avangin kum 2 chuang hma la theilo mah ila harsatna tam tak karah kum thum emaw chhung leka Mizoram Sawrkarin Aizawl East-II chhunga hmalakna rotling leh mipuite tana chenfakawm tak tak infrastructure a dinsak chu lawmawm a tih thu sawiin, hengte hi bial mipuite tan pawha thil lawmawm leh chhinchhiah tlak tak takte an ni, a ti.

Minister Pu Robert Romawia Royte in a bial chhunga hmasawnna ruhrel thawh zawh hrang hrang a hawn zingah hian PWD kaltlanga cheng nuai 68 senga Armed Veng South Community Hall leh Armed Veng chuan hnuai inkar kawng RCC Raod siam te, District Jail to CRPF Camp RCC road cheng nuai 16 senga siam te, Chite Venga Upper Chite Road cheng nuai 50 senga siam te, Tuithiang Veng hnuai atanga Venglai inkalpawhna kawng cheng nuai 50 senga siamte a tel a. Heng bakah hian UD&PA kaltlanga cheng nuai 149 senga Armed Veng Community Centre leh Armed Veng chung inkalpawhna kawr chunga lei/link drain siamte leh Chite Lei cheng nuai 205 senga Tourism Department-in WAPCOS kaltlanga an dawhte a tel a ni.

Tukin vek khan Aizawl East -II bialtu MLA Pu Robert Romawia Royte chuan a bial chhunga hmasawnna ruhrel siam tur engemawzah lungphum a phum a, heng zingah hian cheng nuai 30 senna tur Armed Veng South Futsal Ground lungphum te, cheng nuai 20 senga Tuithiang Futsal Ground siam chhunzawmna tur lungphum te, cheng nuai 30 senga Tuithiang Veng hnuai atanga Venglai inkalpawhna kawng siam chhunzawmna tur lungphum leh cheng nuai 300 senna tur PWP-in an siam mek Armed Veng mawnga checkdam lungphumte a phum a. SASCI hnuaia Chhinga Veng leh Electric Veng inkar kawr, RCC link drain cheng nuai 85 a thawh tur lung chu phum bawkin, hnathawh tan thuai tum a nih thu a sawi.

Sports & Youth Services Minister hi UD&PA leh PWD Aizawl Road North official-te bakah khawtlang hruaitute'n an tawiawm a ni.