4356/2023-2024

Hnahthial the 27th March, 2024: Lok Sabha MP Inthlanpui kan Hmachhawn tura inbuatsaihna chu ngawrh taka kalpui mek a ni a, inthlanna felfai leh thianghlim a awm theih nan nasa taka inbuatsaih chhoh mek a ni. April ni 19 a inthlan lo thleng tura chanvo hrang hrang nei (Polling Officials) te tan vawiin khan Govt Higher Secondary School, Hnahthial-ah training buatsaih niin 29-South Tuipui (ST) Assembly Segment hnuaia Polling Station hrang hrang vil tur Presiding Officers, Assistant Presiding Officers leh Polling Officers te an kalkhawm a, District Level Master Trainer (DLMT) ten training hi an pe a ni.

Hnahthial District Election Officer, District Bawrhsap ni bawk Pu Chuauhnuna chuan training hlawkthlak tak hman a nih theih nan duhsakna a hlan a, kalkhawmte chu an mawhphurhna theuh ngai pawimawh a, lungrual taka thawk ho turin a chah a, an chanvo theuh chu a pawimawhin, fimkhur ngai em em a ni a, tha taka inbuatsaih turin leh hriatthiamlohte a awm chuan zawhna zawt hreh lo turin a chah bawk.

Vawiin training-ah hian DLMT 4, Pi Betty Lalrinfeli, Pu R Vanlalruata, Dr C Hmingthanzuala leh David Laltanpuia Hmar te chuan election kaihhnawiha tul leh pawimawhte inhrilhhriatna an nei a, kalkhawmte atangin zawhna leh chhanna hun hman a ni bawk. Training thawh hnihna hi April ni 8 a neih tura ruahman niin thawh thumna (3rd and final training) hi April ni 16 a neih leh tura ruahman a ni bawk.