4357/2023-2024
Champhai, the 27th March, 2024: District Disaster Management Authority (DDMA), Champhai District bultumin vawiin khan chhiatrupna thlen thulha che chhuak thei tura din, Quick Response Team (QRT) te tan intuaitharna refresher programme buatsaih a ni.
He hun hmanpuitu District Bawrhsap Pu James Lalrinchhana chuan District Disaster Management Authority-in rikrum thila chhiatna thleng thinte laka lo invenlawk leh chhiatrupna lo thlen thulha chetlak dan turte ngun taka ngaihtuahin hma a lak thin thu a sawi a. Champhai District-a QRT member thalai 100 te tan training buatsaih a lo nih tawh thu sawiin, an tana intuaitharna buatsaih a ni leh thei chu lawmawm a tih thu a sawi a, hei hian inpekna zau zawk leh inzirtharna hlawk tak a pek ngei a beisei a thu a sawi bawk.
DDMA Champhai District Chairman Pu James Lalrinchhana chuan QRT Team member thalai kalkhawmte chu taksa leh rilru hriselna ngaipawimawh tur leh ruihhlo laka fihlim tum turin a chah a. Midangte tana innghahna tlak an nih theih nan theihtawp chhuaha training kaltlanga zirtirnate ngun taka ngaithla turin a fuih a. QRT Refresher Programme-ah Mizoram Environment & Forest Consultative Forum (MEFCOF) leh Indian Society on Tobacco and Health nena tangkawpa nungcha leh ramngaw humhalh bakah zuk leh hmuam chungchang inzirtirna pawimawh tak, QRT Member thalaite tana zehtel a ni chu remchang a tih thu a sawi a. Kalkhawmte chu an thil zir leh hriat ang angte midangte zirtir chhawngtu nih tum theuh turin a chah nghal bawk.
A hawnna hun DC Office Complex-a neih hi Pu K. Zorammuana, Addl. DC & CEO, DDMA Champhai District chuan kaihruaiin Pu F. Lalrinmuana, President, Sub-Hqrs YMA Champhai & President, Sub-Hqrs. MEFCOF Champhai hnen atangin thusawi ngaihthlak a ni a. Pu VL Bela, President, MEFCOF, Mizoram & Working President, Indian Society on Tobacco and Health, Mizoram-in 'Ramngaw leh Nungcha humhalh' tih leh 'Zuk leh hmuam chungchang' tih thupui hmangtein zirtirna a pe a. Dr. Vanlalnunpuii Ralte, Nodal Officer, SVEEP in election kaihhnawih hriattur pawimawhte a sawifiah a. Pu Moses Lalfakawma Tlau, SDC in lawmthu sawiin chawhma hun hman hi a khar a ni.
Chawhnu lamah QRT refresher programme hi chhunzawm niin, Pu VL. Hruaimawia, DO, DM&R Champhai District-in chhiatrupna thlen thulha chetlakna hmanruate leh a hman dante a sawifiah a. Hemi hnu hian Keilungliah Tuikhuahah tuitla chhar dan 'Water Rescue & Diving Technique' neih a ni.
Attachment
- Loading attachment...
