4358/2023-2024

Dated Serchhip, the 27^th March, 2024: Serchhip District Election Officer Pu David Lalthantluanga, Serchhip DC chuan vawiin khan Vanchengte, Sialhau, Thentlang, Rullam, Lungpho leh Ngentiang a tlawh a. Heng khuaa Polling Station te hi a hmunhma enfiahin, Lok Sabha Inthlanpui lo awm tur atan hman tlak ngei a nih leh nih loh a enfiah a. BLO te kawmin mamawh an neih te leh an hmalakna te a sawipui.

Vawiin Spot Verification-ah hian inthlan hlawhtling taka neih a nih theihna tura Polling Station te inpuahchahna hrang hrang chipchiar taka en ho a ni a. Election Commission of India (ECI) in Polling Station tina awm ngei tura a bituk te - a panna kawng mumal tak, kawlphetha leh tui thianghlim in tur hnianghnar, mipa leh hmeichhe inthiarna (toilet), ramp, furniture mamawh te, mobile connectivity leh telephone (landline) te a awm ngei em tih te leh venhimna chungchanga ruahmanna awmte (security arrangement) enfiah a ni.

Serchihp DC Pu David Lalthantluanga chuan Lok Sabha Inthlanpui hmachhawn tura inpuahchahna kawngah kum upa te, rualbanlo wheelchair hman ngai te tana awlsamna siamsak chu ngaih pawimawh a tul thu a sawi a. Mipui mimir tan pawh vote thlak tura rei tak intlar ngai lo tur leh hahdam zawka vote an thlak theih nan ruahmanna siam turin BLO te a hriattir a. Hmaih palh awm lo tura uluk leh fel fai taka inbuatsaih tura chahin mamawh an neih leh harsatna an neih chuan District thuneitute hnena thlen turin a hrilh a ni.

Polling Station atan hian Middle School leh Primary School te ruat a ni a. DC hian Vanchengte Middle School, Sialhau Government Middle School, Thentlang Primary School, Rullam Govt. Middle School, Lungpho Govt. Middle School leh Ngentiang Govt. Middle School te a tlawh a ni.

Pu HD Lalpekmawia, Project Director, DRDA, Serchhip leh Official dang ten Pu David Lalthantluanga hi an tawiawm a. Khaw tinah BLO te leh khawtlang hruaitu ten an lo dawngsawng a. Lungphoah zan riakin naktuk hian Thinglian, Hmunzawl leh Keitum an tlawh leh dawn a ni.