1764/2023-2024

Hnahthial the 5th September 2023: Mizoram State AIDS Control Society (MSACS) leh District AIDS Prevention & Control Committee (DAPCC) tangkawp huaihawtin vawiin khan Electric Veng Community Hall-ah Red Ribbon District Level Quiz Competition buatsaih a ni a, District Bawrhsap Pu Chuauhnuna chuan khuallian niin a hmanpui.

District Bawrhsap Pu Chuauhnuna chuan Zirtirtute ni puala District Level Quiz Competition buatsaih a ni chu lawmawm a tih thu a sawi a, zirtirtu kalkhawm zawng zawngte chu chibai a buk a ni. Mizoramah leh a bikin Hnahthialah HIV hrik kai an tam ta lutuk chu runthlak a tih thu sawiin a dona kawngah mitin tanrual a tul hle a ti bawk. Zirlai naupang leh thalaite hnenah HIV hri hlauhawmzia leh ram a tihchhiat nasat thu hrilhhriatna kawngah nasa lehzual a tan lak tul a tih thu a sawi bawk. Khawvel ram hausa leh changkangte chu mihring quality, nundan zemawi leh thiamna tak tak ngai pawimawh ram leh mihring thiamna ti hmasawn tura hma la nasa an ni tiin zirna leh hriselna ngai pawimawh zual zel turin kalkhawmte a fuih a ni. India ramin hmabak eng tak a neih chhan chu hnathawk thei thalai rual (working age) mihring a ngah chu a ni a ti a, thalaite hnathawk theilo tura hnung khirhtu ze thalo leh hrisel lo te chu pumpelh zel a nih theih nan tanrual a pawimawh hle tiin natna hrik pumpelh theia invawn thianghlim chu?n a pumpelh theih thu a sawi bawk a ni.

MSACS leh DAPCC huaihawt District Level Quiz Competition hi Dr Sanglura chuan kaihruaiin; Dr Lalrengpuii Ralte, CMO Hnahthial District chuan report tawi a pe bawk. Vawiina Quiz Master te chu Hnahthial ÐEO/DPC Pu Micky Lalenkawla leh Dr Zosangliani te an ni a. Hnahthial District chhunga School hrang hrang intihsiakna a titha pathum thlanchhuah Govt High School, Govt Higher Secondary School leh FD Higher Secondary School Hnahthial ten intihsiakin, a titha ber hian State Level a intihsiaknaah Hnahthial aiawhin an chhuak leh dawn a ni.

Vawiin Red Ribbon District Level Quiz Competition result chu hetiang hi a ni:

Pakhatna: Govt High School (momento leh pawisa fai cheng 5,000/-)

Pahnihna: FD Higher Secondary School (momento leh pawisa fai cheng 4,000/-)

Pathumna: Govt Higher Secondary School (momento leh pawisa fai cheng 3,000/-) te an ni.