3593/2023-2024

Hnahthial the 31st January 2024: Vawiin khan Hnahthial DC Meeting Room, Rallangtlang-ah Rashtriya Gram Swaraj Abhiyan (RGSA) chungchang inhrilhhriatna hun buatsaih a ni a, he hun hi Pu Chuauhnuna, District Bawrhsap chuan kaihruaiin Pu Beitlotha Nohro, DLAO chuan RGSA nihphung leh hmalakna hrang hrang report a pe bawk.

District Bawrhsap chuan department hrang hrang thawhhona a pawimawh hle tiin department hotute chu an hma zawn theuha hmasawnna hna awm thei te hmu thiam a, VC te leh department đangte nen thawk ho a chak zawka hmasawnna hmel an hmuh theih nan an huang zauh thiam zel turin a fuih a, vawiin programme chu tangkai thei ang bera taka hmang theuh turin kalkhawmte a chah bawk.

He hunah hian RGSA kaltlanga Department hrang hrangte leh VC-te thawhho theih dan zir ho a ni a. Department-te leh VC te chu hnathawh chungchangah inrawn tam tur te, Sustainable Development Goals (SDG) tih hlawhtlinna tura hmalak theihna hrang hrang awmze nei zawka ruahmanna siam thin tura chah an ni a, Department-te pawh thawhhona tha zawk nen ruahmanna nei tura fuih thar an ni bawk.

RGSA chu tualchhung sawrkar thuam chak na tura hmalakna niin Ministry of Panchayati Raj hnuaia Sorkar Laipui Scheme a ni a , hmasawnna ngelnghet leh tlo zawk a awm theih nana tualchhung sawrkarte tihchak leh tihhmasawnna tura ruahman a ni. Mizoramah chuan RGSA hnuaia hmalakna hi LAD-in kengkawhin, tualchhung sawrkar VC-te tan hmalakna hrang hrang an kalpui thin a ni.

Tùn dinhmunah RGSA kaltlang hian Panchayat Bhawan (VC House) 150 sak tawh niin 93 thuam that tawh a ni. VC 15 ah Common Service Centre din tawh niin Desktop Computer 243 semchhuah a ni tawh bawk. RGSA hnuaia Economic Development & Income Enhancement Project kaltlangin - Arecanut Leaf Plate Production Centre, Bilkhawthlir (cheng nuai 49 ); Rural Homestay & Agro-Tourism Project, Tuipui D ( cheng nuai 84) leh Handloom Design Training cum Production Centre, Thenzawl ( cheng nuai 141.23 ) te thawh zawh tawh a ni a, Hnahthial, Khawzawl leh Saitual-ah te District Panchayat Resource Centre sak mek a ni bawk. Revamped National Panchayat Award 2023 ah Ngopa (Saitual District) chuan SDG hnuaia theme 9 ah titha ber lawmman dawngin sawrkar laipui atangin pawisa fai cheng nuai 150 an lo dawng tawh bawk a ni.

Vawiin meeting-ah hian District Bawrhsap Pu Chuauhnuna leh DLAO Pu Beitlotha Nohro te bakah Hnahthial Addl SP, Pu Beimosia Lapi, SDO (S) Pu Neng Thianlala, BDO Pu Lalbiakfela, SDC Pi Betty Lalrinfeli leh Hnahthial District a department aiawh te an tel a ni.