3594/2023-2024

Hnahthial the 31^st January 2024: District Level Committee on Fire Prevention (DLCFP), Hnahthial District chu vawiin khan an Chairman leh District Bawrhsap ni bawk Pu Chuauhnuna hovin thutkhawmna an nei a, DFO leh DLCPF Member Secy Pu Vanlalzarzoliana’n agenda sawi hawnna neiin kum hmasa lama an hman thin dan tlangpui tarlanna a nei.

District Bawrhsap Pu Chuauhnuna chuan Kangmei venna hapta Feb 5-9 2024 inkara neih turah hian kangmei ven pawimawhzia uar lehzuala inhrilhhriat a tul a ti a, thing leh mau, nungchate humhalh kawngah inzirtirna tha a awm theih nan kalkhawmte chu tha leh zung seng theuh turin a chah. Kangmei chhuak laka ven hna chu department bik chanpual ni lovin mi zawng zawng mawhphurhna  a ni a ti a, khawtlang hruaitute chu hemi kawngah thawhhopuiah a  sawm nghal bawk  a ni.

Vawiin committee-ah hian kangmei venna hapta hman dan tur ngaituah ho a ni a, hapta hawnna (fire prevention awareness week inauguration) chu February ni 5 ah neih ni se tih relin a hmun atan Govt Hnahthial College ni se tih a ni bawk. Kum hmasa lama tih thin dan angin Independence Day ah kangmei veng tha khua leh VC te chu recognition/appreciation certificate pek leh ni se a ti bawk. Tin, hei bakah vawiin thutkhawm chuan kangmei chhuak vennan inhrilhhriatna uar zawka kalpui ni se ti a, flyers bakah nitin chanchinbu chhuak thin ah te pawh uar zawka mipui inzirtirna chhuah ni se a ti bawk a ni. Hnahthial District chhunga department hotute leh DLCPF member te he hunah hian a tel tha hle.