3595/2023-2024

Vawiin khan kumina Champhai District-a kangmei ven hapta 'Fire Prevention Week' hman dan tur relin District Level Fire Prevention Committee an thukhawm.

Committee Chairman Pu James Lalrinchhana, Champhai DC chuan meeting kaihruaiin kangmei ven kawngah department leh tlawmngai pawl hrang hrangten thawhhona tha tak an nei chu lawmawm a tih thu a sawi a. Ram a kanin YMA, Fire Department leh Forest Department ten a thelh hna theihtawpin an thawh thin vangin lawmthu a sawi a, Kangmei tichhuaktute chu na taka hrem thin an ni tiin DC chuan mipuite inzirtirna lama hmalakna pawhin hmasawnna a thlen zel a ni, a ti.

He hunah hian State Level-a an lo rel tawh angin kumin Fire Prevention Week 2024 chu thla thar February ni 5-9 chhungin Champhai District-ah hman nise tiin an rel a. February ni 5-ah hapta hawngin khuallian atan Champhai Addl DC beisei nise tiin an rel bawk. Lo hal hun tawp atana ruat March ni 15 leh hmunphiah chingtute tan March ni 31 tih chu Champhai District-ah zawm a nih ngei theih nan, rokhawlhna a awm palha lo hal hman lote vengthawng chungin ni hniha sawn hma nise an ti a. Nikum pawh khan hetiang hian kangmei laka invenna lo kalpui ni tawhin, Champhai District-ah lo hal hun bawhpelh an awm lo tih meeting-ah hian tarlan a ni.

Vawiin meeting hian kangmei ven hapta chhunga ram tikang lo tura inzirtirna hrang hrang, Office leh zirna in a intiamkamna neih te, DLAO-in VC te online meeting neihpui te, Youtuber leh Gospel speaker te campaign atana hman te, kangmei chhuah duh hun chhunga silai khuahkhirh, panel discussion leh essay writing competition te buatsaihin, hemi atana hma lo latu tur an inruat fel nghal a. Ram kang ven kawnga thawk thate tan Village level inelna buatsaih leh nise tiin, hma la tha chhinchhiah tlak zual an awm chuan lawmman pek ni bawk se tiin an rel a ni.

Vawiin meeting-ah hian nikum khan ram tikangtu mi 6 lakah Committee chuan FIR a thehlut a, heng mite hi an vaia thiamloh chantir niin, an thing tihchhiat hu phun a, enkawl zui tura hrem an nih thu tarlan tel a ni bawk.