3734/2023-20214

Hnahthial the 8th February 2024: January ni 25,2024 a Mizoram State Road Safety Council, Transport Minister hova meeting in February 2024 chhunga Mizoram puma Road Safety Month hman nise tih a rel behchhanin vawiin khan DC Meeting room-ah Addl DC Pu Lalvenhima kaihhruaiin thutkhawmna neih a ni a, Road Safety Month chhunga hmalakna tur chi hrang hrang (action plan) ngaihtuah ho a ni.

Thutkhawm kaihruaitu Addl DC Pu Lalvenhima chuan mi tlemte fimkhur loh vanga nunna chan an awm thin chu pawi a tih thu a sawi a, No Tolerance Month chhung hian dan kengkawh tute bakah mipuite fimkhur lehzual turin a duh hle tiin vawiin meeting chuan rah tha leh duhawm a chhuah ngei a beisei thu a sawi. Vawiin thutkhawm chuan Road Safety Month chhung hian lirthei endik runpui (No Tolerance Drive) feb ni 12-17 chhungin neih ni se tih a rel a, Hnahthial khawchhunga hmun remchangah Police leh ZDU tangkawpin check-point siamin document endikna neih thin ni se a ti. Hnahthial khaw chhung, zirna in hrang hranga class-V chin chung lamah road safety pledge nei tura hriattirna chhuah ni se tiin Higher Secondary School leh college tan police lamin inhrilhhriatna (awareness) neih pui se a ti a, Road Safety Awareness atan lirthei inkaihhruaina hrang hrangte an hriat theih nan traffic police/police te zingah institution hrang hrang a NCC te duty tir ve ni se a ti bawk. Vawiin meeting chuan Road Safety Pledge hi Hnahthial ZDU member-te leh motor tinah tar ni se, ZDU ten lirthei association hrang hrang te hneneh uar lehzualin awareness lo nei se a ti bawk a ni.

Kumin Road Safety Month thupui atan ‘’I him theih nan Traffic Rules te zawm thin ang che’’ (Obey Traffic Rules for your own safety tih chu thlan niin vawiin thutkhawmah hian Addl SP, DTO aiawh leh ZDU Hnahthial OB te an tel a ni.