3735/2023-20214

8.02.2023 : Pu M. Misael, Deputy Election Officer, Champhai chuan MP Election lo awm tur atana Final Electoral Roll a tlangzarh.

Vawiin khan DC Conference Hall, Keifangtlang ah MP inthlan lo awm tur atan Final Electoral roll tlangzarhna hun Pu M. Misael, Deputy Election Officer kaihhruainain hman a ni a, Pu M. Misael chuan Summary Revision kum 1 a vawi 1 neih thin chu nikum ah khan vawi 4 neih a nih avangin tun tumah hian vote nei thar hi kan neih tlem phah tih a sawi a, Champhai District Final Electoral Roll, 2024 a hun taka peih fel tura nasa taka thawk tu DC Election Branch, ERO, AERO, BLO te thahnemngaihna leh thawhrimna chu fakawm tiin an chungah lawmthu a sawi a. Inthlan hlawhtling tak nei thei turin Electoral Roll dik leh felfai kan neih hmasak phawt a tul thu a sawi a. Champhai District-ah Department leh NGO te thawhhona in electoral roll hearing felfai tak an nei thei chu lawmawm a tih thu a sawi a. Kan hma lawk a MP Inthlan 2024 hlawhtling taka neih anih theihnan Vote nei zawng zawngte chu Democracy hlutna hre reng chungin an dikna chanvo theuh vote hlu tak thlak ngei turin a sawm a. Party aiawh, MJA leh tlawmngai pawl hruaitute chu anmahni zawn theuhah mipuite lo zirtir a, vote thlak ngei tura lo ti phurtu ni tura tan la turin a sawm a ni. Kal khawm te atanga zawhna awm te a chhan hnuah Final Electoral Roll a tlangzarh a, Party tin te hnenah a semchhuak nghal a ni.

Final Electoral Roll-a tarlan a nih danin, Champhai District-a Assembly Constituency 3 ah polling station 84 awmin vote nei mi 57,454 an awm a, an zingah mi 28,018 chu mipa niin mi 29,436 te chu hmeichhia an ni thung a, mipa aiin hmeichhia 1,418 in an tam zawk a ni. Draft roll tihchhuah hnuhnung ber aiin vote 258 in final electoral roll ah hian vote nei an pung a, mitthi leh awmhmun sawn bakah awmnawn avanga vote paih 426 an awm a ni.

23 Champhai North Assembly Constituency ah hian polling station 30 a awm a, vote nei mi 20,113 awmin mipa 9,755 leh hmeichhia 10,358 an ni a, vote nei thar 49 an awm a, vote nei thar hi za zela 0.24 an ni.

24 Champhai South Assemble Constituency ah polling station 25 an awm a, vote nei mi 21,534 awmin mipa 10,278 leh hmeichhia 11,256 an ni a, vote nei thar 181 an awm a, vote nei thar hi za zela 0.85 an ni.

25 East Tuipui Assembly Constituency ah polling station 29 a awm a, vote nei mi 15,807 awmin mipa 7,985 leh hmeichhia 7,822 an awm a, vote nei thar 28 awmin vote nei thar hi za zela 0.18 an ni.

23 Champhai North leh 24 Champhai South Assembly Constituency ah mipa aiin hmeichhia an tam zawk a, Champhai Vengthar ah Vote nei tam berin mi 1,353 an awm a, Keifangtlangah vote nei tlem berin mi 78 an awm ve thung a ni. Kum 18 atanga kum 19 inkarah vote nei mi 2,843 an awm a, kum 20 atanga 29 inkarah vote nei mi 15,362 an awm a, kum 30 atang 39 inkarah vote nei 14,130 an awm a, kum 40 atang 49 inkarah vote nei mi 10,657 an awm a, kum 50 atanga 59 inkarah vote nei mi 6,737 an awm a, kum 60 atang 69 inkarah vote nei mi 4,680 an awm a, kum 70 atang 79 inkarah vote nei mi 2,188 awmin kum 80 chunglam ah vote nei mi 857 an awm bawk a ni.