3736/2023-2024

2024 Ramtuk thla ni 8: Special Summary Revision, 2024 neih zawh tak aṭanga buatsaih, Lok Sabha MP Inthlanpui, 2024-a hman tur Kolasib District-a assembly bial pathuma final electoral roll chu vawiin khan Kolasib Deputy District Election Officer Pi Melody Ngurthantluangi chuan DC Conference Hall-ah a tlangzarh a. Final electoral roll hi political party ai awhte leh ERO/AERO-te hnenah a hlan nghal.

Kolasib Dy DEO Pi Melody Ngurthantluangi chuan MP Inthlanpuia hman tur final electoral roll felfai tak a hun taka tlangzarh theih a ni chu lawmawm a tih thu sawiin, a buaipuitute chungah lawm thu a sawi a. MP Inthlanpui lo awm turah inthlan felfai leh thianghlim tak a awm theih a beisei thu sawiin, Kolasib District-a vote nei zawng zawngte chu inthlannaah vote thlak ṭheuh turin a chah nghal a ni.

Vawiina final electoral roll tlangzarhnaah hian District Level Standing Committee member-te - election official-te, sawrkar official dangte, political party, NGO, MJA leh MPF ai awh leh prominent citizen-te an tel a. Election Officer Pi Christina Lalmuanzuali chuan final electoral roll dinhmun tlangpui tar langin, sawi hona hun hman a ni bawk.

Vawiina tlangzarh tak Kolasib District final electoral roll, 2024-ah hian 4-Tuirial (ST) Assembly Constituency (A/C)-ah vote nei mipa 9,016 leh hmeichhia 9,419, an vaiin mi 18,435 an awm a; draft roll aṭanga paih 154 leh thun thar 244 awmin, draft roll aia a punna hi 70 (0.38%) a ni. 5-Kolasib (ST) A/C bialah vote nei mipa 11,342 leh hmeichhia 12,739, an vaiin mi 24,081 an awm a; draft roll aṭanga paih 303 leh thun thar 414 awmin, draft roll aia a punna hi 111 (0.46%) a ni. 6-Serlui (ST) A/C bialah voter mipa 10,380 leh hmeichhia 10,906, an vaiin mi 21,286 an awm a; draft roll aṭanga paih 148 leh thun thar 314 awmin,  draft roll aia a punna hi 166 (0.79%) a ni. Kolasib District-ah hian a pum puiah vote nei mipa 30,738 leh hmeichhia 33,064, an vaiin mi 63,802 an awm a; draft roll aṭangin voter 347-in an pung a, a punna hi 0.55% a ni.

Mipa leh hmeichhe intam hleih dan (sex ratio) anga chhutin Tuirial bialah voter mipa 1,000 zelah hmeichhia 1,045; Kolasib bialah voter mipa 1,000 zelah hmeichhia 1,123 leh Serlui bialah voter mipa 1,000 zelah hmeichhia 1,051 awmin, Kolasib District pumah voter mipa 1,000 zelah hmeichhia 1,076 an awm a. Electors to Population Ratio anga chhutin Kolasib District chhunga mihring 1,000 zela mi 569-in vote nei ang an ni a. Mihring 1,000 zela vote nei zat hi Tuirial bialah 661, Kolasib bialah 598 leh Serlui bialah 485 a ni.

Kum bi hlawm ṭhen (age cohort) anga thliarin, Kolasib District chhungah hian kum 18-19 inkar voter 2,842; kum 20-29 inkar voter 16,920; kum 30-39 inkar voter 17,220; kum 40-49 inkar voter 11,748; kum 50-59 inkar voter 7,202; kum 60-69 inkar voter 4,968; kum 70-79 inkar voter 2,139 leh kum 80 chin chung lam voter 763 an awm a ni.

Tuirial biala polling station 26 awmah, voter 1,344 awmna 4/15-Kawnpui-V P/S chu voter tamna ber niin, voter 98 awmna 4/25-Seṭhawn P/S chu voter tlemna ber a ni a. Kolasib biala polling station 29 awmah, voter 1,298 awmna 5/9-Khuangpuilam P/S chu voter tamna ber niin, voter 330 awmna 5/5-S. Chhimluang P/S chu voter tlemna ber a ni a. Serlui biala polling station 34 awmah, voter 1,093 awmna 6/30-Rengtekawn P/S chu voter tamna ber niin, voter 178 awmna 6/9-Saihapui 'V' P/S chu voter tlemna ber a ni thung a. Kolasib District pum huapin polling station 89 awmin, voter 1,344 awmna 4/15-Kawnpui-V P/S chu voter tamna ber niin, voter 98 awmna 4/25-Seṭhawn P/S chu voter tlemna ber a ni thung.

Vawiin hian service voter roll pawh tlangzarh nghal niin, SSR 2024 kalpui chhung hian Kolasib biala service voter 3 chuan sipai aṭanga an chawlh tawh avangin service voter aṭanga paih an dil a. Heti hian Tuirial bialah service voter 132, Kolasib bialah service voter 123 leh Serlui bialah service voter 145 awmin, Kolasib District pum puiah service voter 400 an awm mek a ni.