No.3966/2020-2021   

Village Council inthlanna Ni 27.08.2020 a neih turah Hnahthial District chhunga Sector Officer te pualin vawiin khan Hnahthial DC's Conference Hall-ah training buatsaih niin District bawrhsap Pu Vanlalmawia leh Superintendent of Police Pu Lalbiakkila te chuan an hmanpui a, Model Code of Conduct chungchang leh Sector Officer te mawhphurhna hrang hrang inhrilh hriat a ni.

Training hawnna thu sawiin Hnahthial District Bawrhsap Pu Vanlalmawia chuan "Democracy-ah chuan inthlanna hi hmun pawimawh ber luahtu a nih avangin kan hma lawka Village Council inthlanna kan neih turah pawh hian felfai leh muanawm taka kan neih a ngai a, chumi tur chuan Sector Officer-te in pawimawhin Magisterial power pek in ni dawn a, in mawhphurhna tha taka in hlen chhuah ka beisei a ni. Election Commission hian tih tur leh tur loh a siam a, chungte chu chiang taka kan hriat tlan a tulin miin complain an neih pawhin dan ang zela kalpui tur a ni" tiin Polling station leh Counting Hall turte chu tha taka kalpui turin a chah a, inthlanna vote thlak tur zawng zawngte chu ziah chhuah vek a tul thu leh Social distancing kalpui a ngaih thu a sawi bakah Hand Sanitizer pawh chhawp reng tur a nih thu a sawi bawk.

Hnahthial SP Pu Lalbiakkila pawhin inthlan pawimawh zia sawiin "mawhphurhna hrang hrang neitu ten kan chet vat a, a kalna turah kan kal tir nghal zel a tul a, mi pakhatin a tih tur a tih tlai hian thil buaithlak a thleng thin a ni. Chuvangin kan hriat loh leh thiam loh a awm pawhin a thiamte zawt zung zung zel ang u. Hnahthial District phei chu kan vanneiin inbiakpawh harsatna em em a awm lova inrawn tlanna chang hriat fo hi a tulin a him a ni" tiin Sector Officer te chuan an area theuh chiang taka an hriat a tul thu a sawi bakah Police lam pawhin Sector Police Officer an ruat dawn thu a sawi bawk a ni. 

He hunah hian Pu Lalneihthanga, Election Officer chuan Role of Sector Officers/Magistrate tih thupui hmangin a zirtir a, Pi Jennifer Vanlalhruaii Pachuau chuan Model Code of Conduct chungchang a zirtir bawk a ni. 

Hnahthial District chhungah hian Village Council 32 ah inthlanna kalpui tur niin hengte hi Sector hrang hrang 6-ah then a ni.