No.1403/2021-2022

Hnahthial the 14th July,2021 - Hnahthial khawphui chhunga Sawrkar Pisa hrang hrang hotute chu vawiin khan District Bawrhsap Pu H.Dolianbuaia kaihhruaiin a Office Conference Hall-ah an thukhawm a, District tih changtlun zelna tura ram mamawh te leh Government Land Pooling system chungchang sawiho a ni.

Meeting kaihruaitu District Bawrhsap Pu H.Dolianbuaia chuan Hnahthial District tih changtlunna kal zelah Sawrkar Department thenkhat ram la neilo - LAD, Economics & Statistics, Coopertation, Law & Judicial, UD&PA, Revenue leh DRDA ten an awmna tur ram an dil thu leh Department lo awm tawh sa te zingah mahni ram luah zo lova ram zau tak neite inhawn a ngaih thu sawiin "sawrkar hmunhma atana ruahman Rallang tlang hmun thenkhat hi Court thu kal lai a nih bawksi avangin a fel hun tur hriat mai theih a ni lova, Department thenkhat zingah Office Building sa thei nghal tura inpeih tawh te an awm a, ruahmanna tha kan neih a ngai a ni" tiin GAD pawhin Sawrkar Department te chu an ram luah sen loh te Surrender tura hriattirna a chhuah tawh thu a sawi a, "Ram luah sen loh neih ringawt hi awmzia a awm lova, tangkai tak hman a nih theih nan midangte tan kan inhawnzau a ngai a ni" a ti.

Sawrkar-in Land Pooling system a kalpui chungchanga thil hriat tur hrang hrangte chu Pi Saizikpui Addl DC chuan sawifiahin "Department thenkhat ten an ram neih an hmang seng lova, a ruaka awm mai mai venhim nan leh Department ram neilo ten an neih ve theih nan te bakah mimalin an nek loh nan te 'The Mizoram Government Land Pooling Management Scheme' chu kalpui a nih thu sawiin Sawrkar ram reng reng chu Sawrkar Agency tan lo chuan pek phal a nih loh thu a sawi bawk a ni.

He hunah hian Hnahthial-a Sawrkar Pisa hrang hrang hotute an kal tha hle a, an ram neih dinhmun te tarlangin fel fai leh uluk taka enkawl turin an inchah a ni.