No.1401/2021-2022

Aizawl the 15th July, 2021 : Vawiin khan Health & Family Welfare, Commerce & Industries leh Higher & Technical Education Department changtu Minister Dr R.Lalthangliana hovin heng department pathum-a hotute leh Govt. Deputy Chief Whip Pu Lalrintluanga Sailo; Prof.F.Lalnunmawia, MLA ; Pu H.Biakzaua, MLA; Pu C.Ngunlianchunga, MLA leh Pu Andrew H.Thangliana, MLA te nen SAD Conference Hall, MINECO-ah inrawnkhawmna hun neih a ni.

Consultative Committee hi kumina an thutkhawm vawikhatna a ni a. Dr.R.Lalthangliana chuan hripui leng karah hmasawnna hna duh angin sawrkarin a thawk tha thei lo chunga department hrang hrangin mipui leh ram hmasawnna tura theihtawp an chhuah chu lawmawm a ti a. A department chan hrang hranga thawktuten an hmalakna theuh leh an department-a thil thleng inhriatpawh tawn chu thil tul tak a nih avangin meeting koh a nih thu Minister hian a sawi a ni.

Commerce & Industries hian COVID hri leng vanga sa leh thlai man to uchuaka zawrh chhuah a nih loh nana an hmalak dan report-in Aizawl DC kaihhruaina hnuaiah department hrang hrang nen thawk hovin sa leh thlai man an bithliah thu te, hei hi khawpuia mi retheite tan a tangkai nia an hmuh thu an sawi a. Man to tak taka sawrkarin a lei thin, PPE Set chu veng hrang hranga puanthuite eizawnna khaihlak mek puihna ni pahfawmin set khat zel Rs.600 manin an thui tir a. Heng puanthui te hian PPE 50 zelah Rs.7500 an hlawh thei nia chhut a ni a. A thawhkhatnaah puanthui 300 an ruai mek a, puanthui 600 rawih tumin scheme hi siam a ni. Tun dinhmunah PPE 200 Health Department-ah an hlan tawh a, naktuk hian 3000 dang hlan leh a ni anga, a vaiin PPE 36,000 thui an tum tih meeting-ah tarlan a ni. Interest Subvention Scheme for Entrepreneurs leh State Incentive Subsidy for MSME Sector hit by COVID-19 hnuaiah Industries Department chuan cheng nuai 292 a chang a. Hemi hnuaiah State Incentive Subsidy bikah Entrepreneurs 44 hnenah cheng nuai 43 semchhuah a ni tawh a, Interest Subvention Scheme hnuaiah tanpuina dawng tur mi 180 thlan chhuah an ni tawh bawk.

Mizorama Higher Secondary School leh college-ah te hripui avanga class kal theih a nih tak loh avangin April ni 24 ah H&TE chuan order tichhuakin online class neih thin a ni a. Sawrkarin zirlaite tan fee a tihhniam sak a. Zirna tluang pangngai bakah rilru lama harsatna tawkte pui thei turin zirtirtute chu July thla khan Counselling and Mental Health training neih tir an ni. RUSA hi phase II kalpui mek a ni a. College sak thar, chei that leh mamawh lei kawngah nasa taka hma an lak bakah he scheme hnuaiah hian zirtirtu post 69 an hnawhkhat a ni.

Tun dinhmunah COVID avangin Mizoram chhung hmun 43 chu containment leh micro containment zone-ah puan a ni a. Vanneihthlak takin tun thlengin Mizoramah black fungus vei an la awm lo. Hmun hrang hrang atangin mi inphal ten Mizoram tan Oxygen Concentrator 1066 a thlawnin an pe tawh a. Chung zinga 721 chu damdawi in leh CCC hmun hrang hranga hman turin thawn chhuah a ni tawh. Oxygen plant hi an neihsa bakah Aizawl khawpui leh District headquarters tinah dah belh a ni dawn a. PM Cares atangin 1000 LPM pahnih - ZMC-a dah tur pakhat leh Civil Hospital-a dah tur pakhat dawn a ni bawk. Report hnuhnung berah ZMC ah damlo 327 an awm a, Aizawla DCHC khum 159 awmnaah khum 129 a la ruak. Mizoram sawkarin CCC 56 a neih mekah damlo 1413 an awm a, 4C 199 awm mekah damlo 1110 an awm. Zemabawk Cancer hospital sak mek bawhzui dan ngaihthlak niin thla 16 dangah chuan zawh theih beisei a ni. Cancer hemna khawl tha chi Linear Accelarator (LINAC) khawl install vek tawh a ni a, thawktute training pek mek niin tun thla tawpah hman tan theih beisei a ni. Inhemna khawl dang Cobalt 60 machine Equinox 80 pawh Mizoram a rawn thleng fel tawh a, a buntu tur engineer te COVID an kai avangin install mai theih a ni lo a, he khawl pawh hi bun theih thuai beisei a ni bawk.