No.1954/2021-2022

Aizawl the 22nd August, 2021- Hnahthial District Bawrhsap leh DLTF Chairman ni bawk Pu H.Dolianbuaia kaihhruaiin vawiin khan a Office Conference Hall-ah DLTF member-te leh VLTF Chairman te chu thukhawmin District Hospital Hnahthial-ah hri kai leh kai loh endikna hmanrua an la ngah tawk thu leh RAgT test kit 2480 an la neih thu tarlan a ni

Meeting kaihruaitu District bawrhsap chuan Covid-19 hrileng dona kawngah tanrual a ngaih thu leh Community Covid Care Centre (4C) atan inbuatsaih hma a tul thu sawiin VLTF te chu harsatna an neih chuan a hnena thlen thuai tura chahin a theih ang anga harsatna sukiang turin hmalak a nih thin dawn thu a sawi a ni

Member Secretary Dr.Lalrengpuii Ralte report atanga a lan danin tunhnai thla 3 chhung kal mekah Covid-19 hri kai hi Hnahthial District-ah hmuhchhuah an tamin June leh July-ah mi 39 ve ve hmuin vawiin Ni 22.Aug.2021 thlengin 104 an awm tawh a ni. Vawiin khan hri kai enkawl dam mi 5 te chuan enkawl an nihna hmun  chhuahsanin tun dinhmunah enkawl mek mi 84 an la awm a, heng zinga mi 3 te chu natna benvawn nei niin hri kaite enkawlna hi CCC -2, leh 4C-6 kalpui mek a ni.  

Sorkar-in discharge inkaihhruaina a siam angin Hri kai enkawlte chu Ni 10 khunghran an nih tawh hnuah insawiselna an neih loh chuan test lovin chhuah thin an nih thu pawh Member Secretary chuan sawiin PM Cares Fund atangin District Hospital Hnahthial-ah PSA Oxygen Plant dah tur chu ruahmanna kalpui mek a nih thu leh tunkar chhung hian a structure din a nih dawn thu a sawi a. Vaccine pek kalpui mekah Ni 27.8.2021 atangin mop-up round kalpui a ni leh dawn a, Ni 2.9. 2021 atangin kum 18 - 44 2nd dose kalpui chhunzawm leh a ni ang. September Ni 22 ah chuan zo fel tura an inngaih thu sawiin Hnahthial khawchhungah Vaccine la lo an la tam tih a sawi bawk a ni.

Medical Nodal Officer Dr.R.Lalsanglura'n Contact tracing an kalpui chungchang report a pek bakah VLTF hrang hrang te chuan an hmalakna hrang hrang an tarlang bawk a ni. 

 Hnahthial  khawpui chhungah inkhawm khap rih niin Covid-19 hri kai awm lohna khuaah erawh chuan VLTF te leh Kohhran hruaitute inbe rawnin Deputy Commissioner, Hnahthial District hnen-ah ziakin dilna an thehlut thei ang. Deputy Commissioner-in phalna a pek te chu chhunah chauh inkhawm phalsak an ni ang a, inkaihhruaina siamte an zawm ngei bawk tur a ni.

Attachment

  • Loading attachment...