4659/2024-2025

Dated Hnahthial, the 15th March, 2025: Vawiin chawhma dar 11:00 khan Horeb Conference Hall-ah Hnahthial District Civil Supplies Office leh Hnahthial District Consumer Union (HDCU) bultumin World Consumer Rights Day hman a ni a. He hun hi Pi K. Vanlalruati, Hnahthial District Bawrhsap chuan khuallian niin a hmanpui a ni.

Khuallian, Pi K. Vanlalruati, District Bawrhsap chuan mitin mai hi consumer kan nih vek thu sawiin dawr neitute leh a leituten rinawm tak leh dik taka thil kan tih a, kan kalpui thin a tul hle tur thu a sawi a. Hnahthial District-ah Consumer Union tha tak din a nih bakah District Consumer Disputes Redressal Commission din a nih thu sawiin Consumer Protection Act, 2019 hian sorkar-in consumer te a ngaih pawimawh zia a lantir thu a sawi a ni.

District Bawrhsap chuan Hnahthial District-ah Consumer Union tha leh chak tak a ding a ni tih hriatte hi a thlamuanthlak hle thu sawiin  khawpui chhungah LPG home delivery in kalpui thei a ni tih hriatte hi a lawmawm thu a sawi a. Consumer ten harsatna leh buaina kan nei a nih chuan kan hruaitute hnenah thlen zel thin tura chahin online hmanga inbumna tam lutuk laka fihlim turin mitinte chu a chah bawk a ni.

World Consumer Rights Day hmanna hun hi Pu Vanlaltluanga, President, Hnahthial District Consumers Union (HDCU) chuan kaihruaiin Pu K. Lalhunmawia, Secretary, HDCU in World Consumer Rights Day thupui  'A just transition to sustainable lifestyles' tih thupui hmangin kalkhawmte zirtirna a pe a. Pu T. Lalduhkima, DCSO chuan lawmthu sawiin hun a khar a ni.