1303/2024-2025

Dated Hnahthial the 25th July, 2024: Vawiin chawhma dar 11:00 khan DC Conference Hall Hnahthialah Hnahthial District Bawrhsap thar Pi Rita Lalnunmawii Pachuau chuan Hnahthial District MJA te, Sub Hqrs YMA, Sub Hqrs MHIP leh Sub Hqrs MUP hruaitute kawmin thawhho puiah a sawm.

Hnahthial District Bawrhsap Pi Rita Lalnunmawii Pachuau chuan MJA te leh NGO hrang hrang hruaitute nen inkawm ho tura ruahmanna a siam chhan sawiin, thawhhona tha leh inpawh tlanna tha an neih theihna atan a nih thu te, chona nasa tak nen Hnahthial District ah a rawn awm thu te, Hnahthial District chu district lian lo tak mihring pawh tam lutuk lo, Mizo hlang awmna a nih avangin MJA te leh NGO ten theih tawp chhuaha an tanrual phawt chuan District hmasawn tak a nih theih a rin thu leh a beisei thu a sawi a. Mihringte hi tumah tha leh dik famkim kan awm lova, hnung lam atanga insawisel mai lovin hmaichhanah thil inhrilh a, infinchhuah thin ang u, tiin infuih tawna theih tawp chhuaha khawtlang, bial leh ram hmasawnna atan hnathawhpuiah a sawm a ni.

Pi Rita-i chuan environment humhalh a tul thu te, disaster management lama tan lak a tul thu te tarlangin tunlai khawvel-ah media a chak tawh em em a, thil kan in hre pawh zung zung theih tawh a, thu chiang leh dik zawk tarlan fo a tul ta hle mai a, chutiangah pawh chuan tan kan lak thar a tul a, tun hnaiah kan ram thenawm a kan unau ten harsatna an tawk a, kan ramah engemaw zat sahimna zawngin an rawn lut a, kan enkawl tur an nih rualin ram mi leh sa dik tak anga chhanvo an neih erawh a thiang lova, fimkhur takin certificate te pawh kan pe chhuak thin tur a ni ang tiin lehkha chhiar a pawimawh zia leh a tul zia pawh a sawitel bawk a ni.

He hunah hian MJA leh NGO hrang hrang hruaitute pawhin an pawl kalphung te, hmalak tawh dan te, hmachhawp an neih dinhmun te tarlangin inpawh tlang takin an inkawm ho a ni. He hunah hian Addl. DC Pu Zothanmawia Khiangte, DRDO Project Director Dr. Malsawmtluanga Fanchun, Pu Lalbiakfela, SDO Sadar, Pi Betty Lalrinfeli, SDC te pawh an tel a ni.