1302/2024-2025

Dated Aizawl, the 25th July, 2024: Vawiin khan IIMC Aizawl, MZU Campus -a India rama Community Radio Station 500 na chu Union Minister of Information & Broadcasting Pu Ashwini Vaishnaw chuan online in Delhi atangin a rawn hawng a. A hawnna programme hi Chief Minister Pu Lalduhoma chuan a office atangin a lo zawm ve.

Thu a sawinaah Chief Minister chuan, Mizoramah Community Radio Station hawn a ni ve ta chu lawmawm a tih thu a sawi a. IIMC Aizawla zirlai te tan leh Radio in a huam phak chin mipuite tan tangkai taka hman a nih chhoh a beisei dawn tih a tarlang. A bial, Serchhip chu a chhehvel ram ten azir avangin lo leh huan nei (farmers) an tam a. Anni puala Community Radio Station din ve a nih theih chuan loneitute zirtirna atan te, khaw chin leh an tana hriattur thil pawimawh te hrilhhriat nan a tangkai hle a rin thu pawh a tarlang a ni.

Community Radio station hi ram bial zim deuh zawk, 12-15 km radius huam thei FM radio a ni a, non - profit organisation/institutions, KVKs, NGOs, registered society leh Charitable Trust ang chiten an dil thei a. A senso hi Rs. 10 - 15 lakh vel a ni thin. Vawiina hawn tak IIMC Aizawl channel hi FM 90.0 a ni.