1301/2024-2025

Dated Aizawl, the 25th July, 2024: Vawiin khan Chief Minister Pu Lalduhoma chuan a office-ah Mizoram Peoples' Forum hruaitute a kawm a. Sawrkar kal zel dan tur an thurawn te ngaihthlaksakin, a kaihhruai sawrkar chu mipuiten rilru thar pua an din anih angin, lang tlang leh huapzo taka an kal zel tur thu a lo hrilh.

Chief Minister hian, MPF ten an lawmpuina leh duhsaknaah lawmthu a lo hrilh a. Sawrkar nitin kal dan uluk taka lo thlira, lo zirchiang a, tihdan tur tha zawk nia lang te sawiho hi a tangkai em em a ni, a ti. State Project Monitoring Committee kal chhoh mek dan te, tun hnaia hnathawh chhia mediaa lo lang thenkhat thawktute chunga hma an lak dan te, tender thenkhata sawrkar thutlukna siam dan te, leiba chhawm an ngah avanga harsatna an tawh dan leh hma an lakzui dan te, central sawrkarin puk theih chin a siam chhungah chauh sum puk an tum thu te, chumi atana inrenchemna lama hma an lakna te, tun hnaia special drawing facility hmanga ni 5 emaw vel chauh an puk belh chhan chu state sawrkar tana a hlawk zawkna a awm vang a ti an nih thu te, CBI chu ram dan tharin a phut ang thlapa General Consent pek an nih thu te a lo hrilhfiah a. Aikal pawh kan titawp dawn a, dan awmsa kan kengkawh ang. Chutiang bawkin Non Practicing Allowances pawh dan ang taka kal kan tum. Mipuiten rilru thar puin sawrkar thar an siam tawh a, huaisen takin, langtlang leh huapzo rorelna kalpui hi kan tum tlat a ni, tiin a lo hrilh.

Rev. Lalramliana Pachuau, General Secretary, MPF chuan kum chanve chhung lekin sawrkar hmalakna tha leh duhawm tak tak hmuh tur a tam avangin an lawm hle tih a sawi a. Tha taka ram inrelbawlna leh hmasawnna a kal zel theih nan; an pawl thiltumin a sawi angin; MPF in a ngaih pawimawh thil te a hnena thlen an nih thu a tarlang. Hruaitu dangte pawhin thusawiin, media hmanga inbeihna a nasa a, mipuite kan phawklek fo ni tein kan hria. Sawrkar sawiselna tam tak hi chu thu taka ngaih tlak loh te, thu tling lutuk lo nasa taka han vawrh lar luih te an ni tih a hmuh theih a. Chutihrualin fimkhur lehzuala sawrkar a kal a tulna te pawh a awmin kan hria. Sawrkar hi kan thlawp a, kan duhsak em avangin kan vei zawngte hi kan rawn sawi a ni, an ti.